ATONG unahon sa pagluwas ang kinabuhi ug ipauwahi lang ang kabtangan kay nagmangtas na karon ang kayo. Tiaw moy daghan na sa mga kinabuhi ang nakalas dinhi lang sa Sugbo, sukad sa pagsud sa buwan sa Marso, ang gitawag nga fire prevention month.

Ang mga butang ato pang makita samtang ang atong kinabuhi usa ra. Kon mahimo inig ulbo sa kayo, ang atong unahon mao ang pagpangita sa mga sakop sa pamilya aron dad-on sa gawas gikan sa dapit diin miigo ang sunog.

Click here for Election 2010 updates

Atong sundon ang mga pahimangno sa mga hingtungdang ahensya sama sa fire department kon unsaon paglikay sa sunog. Sama sa pag-unplug sa wire sa mga appliances, pag-off sa stove, dili paduwaan sa mga bata ang posporo, ipahimutang og maayo ang kandila ug lamparilya nga maoy gigamit nga suga panahon sa kagabhion.

Tungod sa grabing kainit sa panahon gikinahanglan ang pag-ilis sa nipa o kugon nga maoy gi-atop ngadto na sa sen ug ipa-check up ang mga linya sa koryente nga nalanay tungod sa kainit.

Ang labing importante ang lokal nga kagamhanan sukad pa unta kaniadto nihimo nag halapad nga pagpangandam.Sama sa pag-abli ug karsada aron sayon alang sa mga bombero ang pag-penetrate sa area nga nasunogan.

Gikinahanglan sab ang pagpalit og daghang mga fire truck, pagbutang og fire hydrant ug pag-edukar sa mga molupyo kon unsaon paglikay sa sunog ug unsay angayang buhaton kun dunay sunog nga moigo.

SA MANDAUE

Kapin sa 300 ka mga panimalay ang naugdaw dihang miigo ang sunog niadtong Lunes –ang maayong balita kay way bisan usa ka kinabuhi ang nakalaas ug wa sab pasagdi ni Mandaue City Mayor Jonas Cortes ang panginahanglan sa mga biktima

Ang mga biktima sa sunog wa gyud intawon mobiya sa dapit sa kabalaka nga ang tag-iya sa yuta dili na mohatag ug pagtugot alang sa pagpabarog sa panimalay. Hinoon ang siyudad duna may housing program alang sa mga sakop sa urban poor.

Sa di madugay ang squatters mapahiluna na unya sa mga desenteng pinuy-anan kay usa man kini sa target sa kasamtangang pangagamhanan, nga gikinahanglan sab ang paghatag ug suporta sa konseho.

OBLIGASYON SA MAYOR

Makalilisang na ang patay nga nahitabo sa siyudad sa Sugbo binuhatan sa mga sakop sa gang. Ang estelo sa pagpatay way kalainan sa vigilantes nga magtaptap samtang magsakay og motorcycle.

Kini maoy resulta sa pagpasagad sa mga namunoan? Abi baya nato og anaa silay political well? Mao man gud ang gipasiatab sa mga city official dungan sa pagsaway sa ilang kontra sa pulitika nga way political well.

Inay hatagan og pagtagad kining dakong problema, ila pa gihapong gidaginot ang paggukod sa kontra sa pulitika sama sa pagpatangtang sa mga basketball board ni Atan Guardo ang kandidato sa pagka kongressman sa south district.

Palihog kay inyo man kining obligasyon, sulbara na ug di nato gamiton alang sa pamolitika.Magpaabot ta sa ilang kampanya batok niini tungod sa interes sa pulitika.

(efren_lonzon@yahoo.com)