SUPERBALITA DAVAO

Editoryal: Napakyas ang gobyerno?

DAW gibuboan og ininit tubig ang administrasyon ni Pangulo Rodrigo Duterte dihang giyagyag ni Vice President Maria Leonor “Leni” Robredo nga pakyas ang gobyerno sa giyera kontra ilegal nga druga.

Gigradohan pa ni Robredo og uno porsiyento ang gobyerno hinungdan nga gibatikos siya sa Malakanyang, ug mibuwelta sab dayon ang Philippine Drug Enforcement Agency (PDEA) diin suma sa ahensya usa ka “political attack” batok sa Pangulo ang gihimo ni Robredo.

Kahinumdoman nga si Robredo gihimong co-chairperson sa Inter-Agency Committee on Anti-Illegal Drugs (Icad) niadtong Oktubre 31, 2019, diin katungod lamang sab niya ang mokomento sa iyang nakita.

Gilayon sab nga nangdepensa ang kapulisan ug giyagyag ang ilang tinuod nga datus nga ilang natala.

“VP Robredo’s public relation bombshell on the ‘massive failure’ of the national anti-drug campaign only shows her ignorance,” pamahayag sa Police Regional Office (PRO)-Davao Region diin sa maong rehiyon naggikan ang pangulo sa nasud.

Kung moingon si Robredo nga napakyas ang gobyerno sa maong kampanya, nganong daghan man ang nasikop? Daghan man ang napatay atol sa lehetimo nga operasyon sa kapulisan?

Basin unya ang gibasihan ni Robredo ang pasiatab niadto ni Duterte nga sud sa tulo ka bulan gikan sa iyang paglingkod, mahurot ug malimpyo ang aktibidad sa ilegal nga druga sa nasud.

Kung kadto ang basihan, hayan namakak ang gobyerno; ug tinuod ang giingon ni Robredo, ug ning karon, subayon ang kahimtang, naa pa ba? Duna pa ba’y mga pusher, drug lords ug users?

Hayan ang makatubag niini ang katawhang Pilipinhon, ug nasayod na ang katawhan kinsa ang napakyas, si Robredo? O si Duterte?

Kung nasuta nga naa pa ang problema sa ilegal nga druga, hayan ang katawhan lang ang makasumpo niini; magtinabangay ang tanan, isumbong dayon sa awtoridad kung dunay mga nagkatag nga ilegal nga drugas.

Lisod man god ning kahimtang sa nasud karon, daw ang politika sama sa “tuyo ug mantika” kung isagol kini, malahi man gyod ang mantika, -- mao kini ang kolor sa pulitika sa nasud ning kasamtangan.

Busa, ning kampanya sa pagbatok sa ilegal nga drugas motabang kita sa gobyerno ingon ug alang sa maayong ugma sa mosunod nga henerasyon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph