ANG programa gisugdan pinaagi sa ritwal ni Bae Ambayeng Omanan uban ni Datu Ongcao Lompipi ug mga sakop sa Datu Lompipi Women’s Organization kon diin gibuksan kini pinaagi sa pag-ampo pinaagi sa paghalad og puti nga manok aron nga bendisyonan ug maseguro ang kalampusan sa proyekto.
Kini gisundan sa pagputol sa ribon alang sa inagurasyon sa bag-ong gitukod nga tangke sa tubig (water tank) ni Mr. Toshi Ueda, Presidente sa Rise Asia; Ms. Yolanda DeLa Cruz, School Principal sa Datu Lompipi National High School; ug Mr. Masanari Ichikawa, Kariya Lions Club Davao ug Kariya Exchange Group Leader.
Nipadayon sila sa seremonyal nga pagpanghugas sa kamot sa pinili nga Grade 7 nga tinun-an nga inubanan sa pagkanta sa komunidad nga gilangkuban sa mga tinun-an sa elementarya ug high school nga atua atol sa maong adlaw. Gikanta nila ang “I love water”.
Ang program gipasayon ni Mr. Sulpecio Ingay, usa sa mga magtutudlo sa nahisgutang eskuwelahan, gisundan sa pagkanta sa Philippine National Anthem ug pag-ampo sa pasalamat pinaagi sa doxology sa mga tinun-an sa Grade 8.
Nihatag gilayon sa iyang opening remarks si Ms. Yolanda A. dela Cruz ug nag-ila sa tanang mga bisita ug isponsor sa Happy Shoes gikan sa Japan.
Siya mapasalamaton ngadto sa tanang mga isponsors sa Happy Shoes ngadto kang Mr. Fujita Kazutaka sa Tokai TV-Phil Fiesta Tokai 2019, Mr. Hiroshige Watanabe (President-The Earth), Mr. Masanari Ichikawa (Kariya Lions Cub) ug Mr. Yuichi Kawata (President sa Carry-up).
Iya sab nga gitimbaya ang presensiya ni Hon. Purificacion Suyco, barangay captain; Datu Ongkao Lompipi, tribal leader); Ms. Mary Ann Lopez, officer-in-charge sa Panipasan Elementary School; Ms. Jeanna O. Japitan, District Guidance coordinator, DepEd Marilog District; DMSF Family pangulohan ni Ms. Josephine B. Alindajao, tigbalita sa ABS-CBN ug ngadto sa tanang mga magtutudlo.
Nagpasalamat siya isip pangulo sa tulunghaan ngadto sa Kariya Lions Club Davao ug Kariya Exchange alang sa pagtubag sa usa sa mga programa sa Department of Education (DepEd) nga mao ang “Wash in School” nga naglangkob sa tangke sa tubig ug pasilidad sa hugasanan sa kamot.
Gipasalamatan sab niya ang Happy Shoes alang sa sayong gasa sa Pasko ngadto sa mga kabataan kinsa maoy makabenepisyo sa maong proyekto sa maong adlaw.
Samtang nihatag sab og mensahe si Mr. Ueda. Iyang gipaila ang Kariya Lions Club ug ang Maharlika Lions Club kinsa maoy nidonar sa tangke sa tubig.
Iya sab nga gipasabot nga ang Happy Shoes project naa na sa ilang ikatulo nga tuig karon nga gipasiugdahan sa grupo ni Mr. Ueda nga mao ang Phil Fiesta Tokai 2019.
Nakadonar na sab sila og solar lantern gikan sa Panasonic sud na sa upat ka tuig, school building alang sa Grade 7 class nga nagkantidad og P1.3 milyon ug ang Happy shoes sukad 2017 hangtud ning kasamtangan.
“We collect shoes for high school and elementary school children last year and we distributed a total of 578 shoes last year and will be distributing 536 shoes this year,” dugang ni Mr. Ueda.
Isip isponsor, gibutyag niya nga nagtinguha sila nga ang ilang mga benepisyaryo motrabaho sa ilang kaugalingon aron nga makakita sab og paningkamot gikan kanila ug di lang magsalig sa ilang “funding agency.”
Si Mr. Masanari Ichikawa, Kariya Lions Club Davao ug Kariya Exchange Group leader, nagpasalamat sab sa komunidad ug nagsulti nga kini na ang ilang ikatulo ka higayon sa Datu Lompipi nga nidonar og classroom building, alang sa Happy Shoes ug sa water collector.
Gihangyo niya ang mga molupyo nga atimanon og maayo ang ilang gidonar aron nga ang sunod nga henerasyon makagamit pa niini ug mapadayag kon unsa sila kaikag nga makapaambit kon unsa ang naa nila ngadto sa komunidad sa Datu Lompipi.
Nalipay sab si Ms. Chona Ongkingko, kanhi presidente sa Maharlika Lions Club, nga nahimong kabahin sa proyekto ug nagpasalamat sa tanan alang sa oportunidad nga makatabang kanila.
Samtang gipasalig ni Mr. Fujita Kazutaka sa Tokai TV nga magpasiugda na sab sila karong tuiga og Phil Fiesta Tokai 2020 ug mobalik pag-usab aron nga manghatag og sapatos.
Samtang gipaneguro ni Mirotho Tomowaga sa IMCom nga sunod tuig palapdan pa nila ang aktibidad aron nga daghan pang mga kabataan sa rehiyon ang malakip ug nagpasalamat usab.
Ubang mga opisyal nga bisita ug mga opisyal sa barangay ug tulunghaan nihatag sab sa ilang mga mensahe atol sa maong aktibidad.
Samtang si Vice Mayor Sebastian “Baste” Duterte nagpasalamat sab “in behalf” sa lokal nga kagamhanan sa siyudad ug nagtimbaya sa mga Japanese givers sa Davao City alang sa Happy Shoes Project 2019, pangulohan sa mga organizers sa Phil Fiesta Tonkai.
Naglaum sab ang bise-mayor nga ang mga sapatos makatabang sa kabataan nga makab-ot ang ilang pasyon ug pangandoy.
Gidayeg sa local government unit (LGU)-Davao City ang mga tigpasiugda sa Phil Fiesta Tonkai ug sa ilang mga partners, Rise Asia, DSMF ug Institute of Primary Health Care aron nga ang kalihukan mahimong posible ug molampos.
Human sa hamubong mensahe, ang pagtunol sa Plaque of Appreciation ngadto sa mga partners Rise Asia ug Tokai TV-Phil Fiesta Tokai.
Gihatagan sab og Plaque of appreciation ang Datu Lompipi High School nga gilagdaan ni Mr. Masanari Ichikawa sa Kariya Lions Club ug Mr. Toshi Ueda sa Rise Asia.
Kini gidawat ni school principal Ms. Yolanda Dela Cruz.
Laing certificate of recognition gihatag ngadto sa Kariya Lions Club Davao ug Kariya Exchange gilagdaan ni Ms. Yolanda Dela cruz ug Mr. Sulpecio Ingay.
Gihimo sab ang paglagda og Memorandum of Understanding (MOU) uban nila Ms. Yolanda Dela Cruz, School Principal ug Kariya Lions, sinaksihan nila Ms. Josephine B. Alindajao, DMSF IPHC executive director, ug Mr. Toshi Ueda sa Rise Asia.
Gisunod gilayon ang pag-apud-apod sa mga sapatos ngadto sa mga tinun-an pinaagi kang Vice Mayor Duterte ug mga isponsor gikan sa Japan.
Gisundan kini sa pagpahulagway sa grupo sa mga miyembro gikan sa Kariya Lions Club, Maharlika Lions Club, Rise Asia uban sa mga magtutudlo sa eskuwelahan, ug mga representante sa komunidad.