GIPAKAGING ni Carmelo Anthony ang defending champion Toronto Raptors pinaagi sa iyang bayanihong itsa sa katapusang kuwatro segundos aron ituboy ang Portland TrailBlazers ngadto sa 101-99 nga kadaugan sa National Basketball Association kagahapon.
Gawas sa itsa nga maoy nakapadaog kanila, sa kinatibuk-an si Anthony mitali og 28 puntos nga maoy iyang career high sukad sa iyang pagbalik og duwa human sa kapin sa usa ka tuig nga bakasyon.
Kadto maoy unang daog sa Portland human sa ilang upat ka sunodsunod nga kapildihan didto sa teritoryo sa Toronto.
Ang Blazers naggukod sulod sa tulo ka quarters, 78-69, ug hinayhinay kining mipahak sa labaw ug ang tres ni Damian Lillard maoy nakapa-eguwales sa score, 99-99, 38 segundos ang nahabilin.
Sa katapusang 13.6 segundos, nakamugna og turnover si Patrick McCaw sa Toronto Raptors nga maoy naghatag og kang-a sa kadaugan sa Portland. Human makadawat og bola sa Anthony haduol sa free throw line dali gilayong nakapabuhagay sa iyang bayanihong itsa.
Si Lillard mitapos sa duwa nga may 20 puntos, midugang og 14 si Hassan Whiteside 10 usab ang natampo ni C.J. McCollum.
Nangulo sa Raptos si Lowry nga may 24 puntos ug 10 ka rebounds, 17 ang nahimo ni Serge Ibaka kinsa milabni usab og 11 ka rebounds.
Samtang yano ra man tuod nga napugnit sa Los Angeles Lakers ang ilang ikaunom ka nagkutay nga daog, 117-87, batok sa New York Knicks, apan na-injured ang usa sa ilang sinaligan nga si Anthony Davis.
Si Davis mibiya sa korte nga nagping-it sa kasakit sa luyong bahin sa iyang hawak human kini matagak sa dihang iyang gisuwayan pagtapal ang nag-drive nga si Julius Randle.
Sa iyang paglupad, na-outbalance kini sa pagtugpa ug maayong pagkahagba sa korte nga nag-una ang buko-buko.
Hinayhinay kining nakabangon nga gitabangan sa iyang mga kauban ug hinuon nakalakaw nga walay nag-agak kaniya.
Kini nahitabo sa katapusang 2:45 segundos sa third quarter ug wala na kini makabalik pa sulod sa korte.
Hinuon ang findings sa x-ray nagpakita nga kini negatibo sa bali ug igo lang kini nga nakaangkon og bun-og.
Sa kadaugan, si LeBron James misumada og 31 puntos ug 15 ang nadugang ni Kentavious Caldwell-Pope alang sa Lakers nga padayon karong naghupot sa liderato sa Western Conference nga may 30-7 nga baraha.
Sa laing duwa, gipatapsingan sa Detroit Pistons ang Cleveland Cavaliers, 115-113, ug gibungog sa Oklahoma City Thunder ang Brooklyn Nets, 111-103.
Gibuntog sa Grizzlies ang Timberwolves, 119-112, ug gipasawop sa Kings ang Suns, 114-103. (JBM)