GIBALIBARAN ni Anthony Davis kagahapon ang tanyag sa Los Angeles Lakers nga $146 million nga extension sa iyang kontrata, matod pa sa tinubdan sa Yahoo Sports.
Plano karon ni Davis nga mag-free agent sa dihang motapos na ang iyang kontrata sa Lakers karong bulan sa Hulyo.
Sa kasamtangan, si Davis adunay $28.7 million nga player option sa 2020-21 season ug ang iyang pagbalibad niini maoy naghatag og timailhan nga abli siya sa mga tanyag sa ubang team ilabi na kadtong andam nga mohatag kaniya sa maximum deal.
Ang iyang manager nga si Rich Paul mipasabot nga kon mahilakip na unya si Davis sa merkado sa mga free agent, ang six-time All Star member elegible na mga makadawat sa lima ka tuig nga $202 million nga maximum contract karong summer.
Samtang sa laing bahin, siguro na nga magpabilin ang higanting si Dwight Howard sa Lakers. Kini human nga gipalabay sa management ang deadline sa pag-waive unta ni Howard.
Buot ipasabot nga guaranteed na ang $2.6 million nga contract ni Howard sa 2020 season. Kon kahinumdoman, si Howard daling gikuha sa Lakers human nga na-injured si DeMarcus Cousins ubos sa non-guaranteed nga kasabutan. (JBM)