CAIBIRAN, Biliran - Nasikop sa kapulisan ang usa ka mag-uuma human nakuhaan og mga armas sa iyang balay sa Sitio St. Joseph, Barangay Cabibihan.
Giila ang suspek nga si Felipe Nartea, alyas Igong, 52.
Pinasikad sa search warrant nga giisyu ni Judge Constantino Esber sa Regional Trial Court Branch 37 sa Naval, Biliran, gironda sa kapulisan ang balay ni Nartea gumikan sa ilegal nga paghupot og armas.
Ang kapulisan pinangulohan ni Police Lieutenant Vic Viros ug taga Biliran Provincial Mobile Force uban ni Police Staff Sergeant Sanjeev Sukhwani.
Narekober sa kapulisan ang mga armas sud sa balay sa suspek nga naglakip sa usa ka kalibre .45 nga pistola; usa ka shotgun nga may magazine; usa ka kalibre .38 revolver ug usa ka improvised rifle nga dunay bala sa kalibre 7.62 mm.
Gidala sa buhatan sa kapulisan ang mga nakuha nga ebidensya ug su Nartea.
Kasong kalapasan sa Republic Act 10591 kun Comprehensive Firearms and Ammunition Law ang giatubang sa suspek.
Padayon siyang giimbistigar sa mga awtoridad. (JKDP)