SA dili madugay, magtukod ang Mactan Cebu International Airport (MCIA) og dugang nga runway aron magamit isip interim nga solusyon sa panahon sa emergency sama sa mga aksidente sa ayroplano ug pag-ayo hinungdan nga dili magamit ang kasamtangan nga runway.
Kini nga probisyon gihimo sa mga awtoridad isip tubag sa padayong trapiko sa kahanginan sa MCIA.
Matud ni MCIA General Manager Steve Dicdican nga sa niagi kanunay ang pagsira sa kasamtangan nga runway tungod sa pag-ayo, maintenance, pag-inspeksyon o aksidente sa eroplnao ug gusto nila nga likayan ang ingon nga mga pagkagubot ug kahasol sa mga pasahero sa umaabot.
“Aircraft emergencies can happen at any time, as we experienced in Cebu and Manila. We also have to factor in the runway maintenance and repairs that need to be conducted. Given the volume of air traffic that MCIA has and its impact on our community and economy, we need to ensure that airport operations will not be disrupted,” dugang niya.
Giklaro ni Dicdican nga kini nga independent parallel nga runway lahi sa fully independent runway nga gisugyot sa GMR Megawide Consortium nga madungagan ang capacity sa kahanginan sa MCIA sa umaabot.
Bisan pa, kini nga runway part sa ika-50 ka tuig nga plano sa GMR Megawide E alang sa tugpahanan sa ayroplano nga gihatagan og Original Proponent Status sa MCIAA nga nagpaabot sa pag-uyon sa National Economic Development Authority (Neda).
Ang parallel runway gipaabot nga mahuman sa 2022 samtang ang independent runway nga mahuman sa 2032. (Mae Fhel Gom-os - USJ-R Journ Intern)