ADUNA na unyay dugang alternatibong kasakyan ang mga Oponganon nga buot makalikay sa kahuot sa dagan sa trapiko gikan sa dakbayan paingon sa dakbayan Sugbo.
Kini human nga pormal nang gibuksan kagahapon Enero 8 ang laing rota nga biyahehan sa usa ka ferry boat nga Topline Express.
Adto kini manukad sa Muelle Osmeña wharf sa luyong bahin sa simbahan sa Birhen sa Regla.
Matod ni Eugene Eric Lim ang CEO sa Topline nga ilang nahuna-hunaan nga moabli ug laing rota paingon sa dakbayan sa Sugbo gikan sa Mactan sanglit ilang nabantayan nga daghan gayud nga pasahero ang mas mopili nga mag ferryboat aron makalikay sa kahuot sa trapiko.
Nasayran nga 15 minutos lang ang biyahe sa ferryboat paingon sa Pier 3 ug pabalik.
Aduna nay unang nagbiyahean nga ferryboat sa naasoyng pantalan nga mao ang Metro Ferry apan sumala pa magdasok gihapon ang mga pasahero hilabi kung tingsakay o peak hours.
P20 ang plete sa mga ferryboat gikan sa Muelle paingon sa Pier 3 ug vice versa samtang P12 alang sa estudyante ug senior citizens.
Magpadayon ra gihapon hinuon nga modunggo ang naasoyng ferry boat sa Marina wharf sa Brgy Ibo inig kahuman niini ug panaog sa mga pasahero sa Muelle wharf.
Susama usab ang ilang pagpasakay sa mga pasahero nga manukad sa Brgy Ibo, modunggo kini inig kahuman sa Muelle Osmeña wharf aron pagpasakay ug pasahero ug una pa molahos na sa Pier 3.
“Pwedi pud sila mogamit sa ilang mga Topcard (Muelle Osmeña) nga we are selling for P30 so when you load this, di namo kinahanglan mopila sa ticketing igo ramo mo-tap ani sa device so mas prefer sa magdali,” matod ni Lim.
Subay sa nagsinanabot nga Sinulog hayan gipahibawo sa kadagkuan sa Topline nga alas 12 sa tungang gabii kutob ang ilang biyahe.
Kini aron matagaan ug kahigayonan ang mga Oponganon nga dunay alternatibong kasakyan sa ilang pagduaw sa dakbayan sa Sugbo.
“Basin mosugod gihapon ta 6AM (Sinulog) amo sang i-check kung 24 hours if kailangan gyud base on experience last year taas gyud ang pila sa pasahero mao nagka problema mi so hopefully makatabang ni especially kani nga route,” dugang ni Lim.
Gihangop ni Lapu-Lapu City Mayor Junard “Ahong” Chan ang bag-ong rota nga manukad sa Muelle Osmeña sanglit sayod siya nga daghan gayud nga mga Oponganon ang nanarbaho sa dakbayan sa Sugbo nga kanunay apektado sa kahuot sa trapiko.
“Dako ni nga impact sa atong siyudad. It’s a good development, dako kaayo ni siyang tabang sa atong problema sa trapiko nanghinaot ta nga daghan pang biyahe unya nga idugan..,” matod ni Chan. (GCM)