ANGAY nga magmatngon og maayo ang publiko, ilabi na ang paggamit sa kuryente ug appliances.
Kini human nga kasagaran sa mga sunog sa pagsugod pa lang sa 2020, kasagaran may kalabutan sa pagpabaya sa mga tawo.
Niadtong Martes sa hapon, laing sunog na usab ang niigo sa Sugbo, ning higayuna sa Siyudad sa Talisay, diin 13 ka mga balay ang naugdaw ug duha ang nadanyos.
Nahitabo kini sa sitio Marimar ug Mahayay sa Barangay Poblacion, Siyudad sa Talisay, alas 4 sa Martes sa hapon, Enero 7.
Dali ra hinuon kini narespondenhan sa Talisay City Fire Station hinungdan nga alas 4:35 sa hapon, hingpit nang napawong.
Matod ni Fire Senior Inspector Arra Alpajaro, city fire marshal, nga giisa ang sunog sa second alarm.
Nagbilin kini og danyos nga gibana-banang mokabat sa P125,000.
Usa ka Romy Patindol ang nakaangkon og first degree burns.
Sa inisyal nga pakisusi, nagsugod ang sunog sa balay nga iya sa usa ka Aniano Sabroso Jr.
Usa sa gitan-aw nga hinungdan ang electrical ignition kun ni-spark nga koneksyon sa usa sa appliances sa balay ni Sabroso.
Apan matud ni Alpajaro nga gipalawman pa nila ang pakisusi.
Una kini nga sunog sa Siyudad sa Talisay ning 2020, apan pipila ka sunog na usab ang natala sa silingang mga syudad, sama sa Cebu City ug Mandaue City, sa dul-an duha pa lang ka semana sa Enero.
“Wala masyadong cases of sunog before sa January. Tinitingnan din namin yan kung bakit. Partly negligence ng tao yung isang factor, meron ding accidents lang talaga, ” pasabot ni Alpajaro. (FMD)