HUMAN nakahukom ang Sinulog governing body nga di na pagngon ang signal sa tanang telecommunication companies atol sa solemn procession ug Sinulog grand parade, doblehon na sa kapulisan ang siguridad.

Matod ni Police Colonel Engelbert Soriano, officer-in-charge sa Cebu City Police Office (CCPO), liboan ka mga uniformed personnel ang ipakatap sa kadalanan.

Apan iyang giklaro nga kon adunay mabantayan nga kadudahang butang, ilang ipapawong ang signal sa lugar.

“Pwedeng wala, pwedeng meron. But the police will be ready to implement it anytime the need arises. Yan po yung key words doon as the need arises,” pagklaro ni Soriano.

Gidugang ni Soriano nga ang Philippine National Police (PNP) kompleto sa mga kagamitan sa pag jam sa signal nga kon gikinahanglanon na kini.

“Halimbawa, if instances were biglang may ma-report sa amin unattended baggage, shutdown kami,” sigun ni Soriano.

Way nakitang problema ang kapulisan sa pagpatuman sa siguridad, matod ni Soriano.

Niuyon ang National Telecommunications Commission (NTC) ug mga telcos sa pag shutdown sa ilang signal, apan mag-agad gihapon sila sa kapulisan nga maoy mipatuman sa siguridad.

Gitahasan na ang intelligence unit sa kapulisan sa pagsusi sa hulga sa nagsingabot nga Sinulog. Kon irekomendar nga kinahanglan nga mag-shutdown, wa silay mahimo gawas sa pagtuman niini.

Ila usab nga hugot nga ipatuman ang 100-meter radius sa liquor ban sa rota sa sinulog.

Butyag ni Soriano nga ilang ipatuman ang executive order ni Cebu City Mayor Edgardo Labella.Pasakaan og kaso ang mga tawo ug establisemento nga makalapas niini.

Nirekomendar lang siya sa kagamhanan ngadto sa mga mamaligyag ilimnon nga di lang botelya ang ila ihatag sa customer.

Kon di sila mosunod niini, ilang dakpon ang molapas ug isulod sa duha ka bust bus nga maoy temporary holding center.

FRATERNITY

Samtang grupo sa mga fraternity sa Siyudad sa Sugbo gipatawag sa kapulisan alang sa peace covenant pagsiguro nga di sila mohimog kagubot atol sa Sinulog grand parade.

Sila ningsaad nga andam sila moabag sa kapulisan sa pagbantay nga mahimong tunhay ang pagsaulog sa Sinulog karong tuiga. Sa nanglabay nga katuigan, ang maong mga grupo maoy hinungdang sa kasamok ilabi na sa panahon sa street party.

Tungod sa panag-away sa mga fraternity, nahunong ang mga kalingawan panahon sa kagabhion. Bisan kon nahilot na ang kasungian sa mga fraternity sa Dakbayan sa Sugbo, gipatawag gihapon sila aron masiguro nga di maghimog kagubot ang mga miyembro niini.