Mayor gidakop, nakapyansa

MAYOR sa lungsod sa Dumanjug, Sugbo gidakop sa kapulisan pinasikad sa warrant of arrest nga giluwatan sa korte sa kasong graft and corruption.

Ang gisikop mao si Mayor Efren Guntrano Gica didto mismo sa iyang balay sa Barangay Poblacion.

Matod ni Police Colonel Roderick Mariano pasado alas 2 sa Miyerkules sa hapon Enero, 8 gi-serve sa Dumanjug police pinangulohan ni Police Major Ardiolito Cabagnot ang warrant of arrest nga gipirmahan ni Judge Reginal Fuentebella sa Regional Trial Court (RTC) Branch 59 sa San Carlos City, Negros Oriental.

Ang pagsikop sa mayor nunot sa kasong kalapasan sa Section 3 sa Republic Act 3019 kun Anti-graft and Corrupt Practices Act nga gipasaka ni kanhi mayor Nelson Garcia batok kaniya.

Giingong may labot kini sa iyang pag-hire sa singer nga si Bamboo niadtong Oktubre 2016, nga atol sa kapistahan.

“Nakapyansa ra hinuon si Gica sa korte sa lungsod sa Barili balor og P30,000 alang sa iyang temporaryong kagawasan.

“...But I’m sure modaog ko sa kaso but ulaw lang nga naa tay picture ba,” matod ni Gica sa phone call sa Superbalita Cebu.

Sukwahi sa pamahayag sa kapulisan, si Gica nagkanayon nga human niya madawat ang arrest warrant, ni-surrender dayon siya aron mopyansa sa kasong graft og corruption tungod sa giingong kwestionable nga pag hire kang Bamboo gikan sa kauluhan atol sa pista sa lungsod niadtong Oktubre 2016.( AYB, ANV)

Related Stories

No stories found.
SunStar Publishing Inc.
www.sunstar.com.ph