NASIKOP sa kapulisan sa Dumanjug, Martes sa gabii, Enero 7, 2020, ang construction worker nga tag iya sa armas nga gigamit sa 5-anyos nga batang lalake pag pusil sa iyang ig-agaw nga 5-anyos usab.
Si Roself Cobol, 33, ulitawo, construction worker, nasakpan kay dunay nakaila sa armas nga siya ang nagdala-dala.
Si Major Ardioleto Cabagnot, hepe sa Dumanjug Police Station, nga nahinabi sa Superbalita Cebu, niingon nga ilang nasubay si Cobol dihang dunay residente sa Barangay Cogon nga nisulti nga nakaila siya sa tag-iya sa armas.
Tungod niini, Martes sa alas 11 sa gabii, sila nibalik sa Barangay Cogon aron sa pag-imbistigar. Ilang gikaistorya ang inahan sa 5-anyos na biktima nga nitug-an nga si Cobol, kinsa ni-surrender sa armas, mao ra usab ang tag-iya.
Suma pa ni Cabagnot nga ang inahan nitug an nga gihatagan sila og P1,000 isip abag nila sa tambalanan.
Nisaad usab kini nga mohatag og laing P2,000 aron ihilom.
“Gusto sa suspetsado nga dili na lang isaba mao nga nihatag na lang sa para tamabal ug dugang unyang gastohan,’suma pa ni Cabagnot
Ilang giadto ang balay ni Cobol, kinsa niangkon nga iyaha kadtong armas dayon gipusasan sa kapulisan.
Ang suspek igsuon kini sa tag iya sa payag nga ni migrate na ngadto sa Mexico.
Niangkon si Cobol nga iyang paltik nga armas iyang giputos og sinena, gisuksok sa bungbong sa payag diin nakit an sa mga bata ug giduwaan.
Ang armas iyang gigamit alang sa pagdepensa sa kaugalingon. Si Cabagnot nibutyag nga ilang pasakaan si Cobol og kasong illegal possession of firearm.