Street dancing, job fair bida sa ika-3 ka adlaw sa Kuyamis Festival
GIDAGSA ang Kapitolyo probinsyal sa manan-away tungod sa ubay-ubay nga pasundayag nga gitanyag.
Usa ka job fair ang gipahigayon kon diin liboan ka mga aplikante gikan sa nagkadaiyang lungsod sa Misamis Oriental ang miaplay.
Libo-libo sab nga trabaho ang gitanyag sa nagkalainlaing kompanya.
Aduna dayon gipahigayon nga Indigenous People Skills Competition kon
adunay lumba himo og basket ug bukag, adunay lumba fire making o pasiga gamit lamang ang kawayan ug flower making contest gamit lang ang lukay sa lubi.
Matag kompetisyon, adunay P2,000 nga premyo isip first prize, samtang P1,000 ang second prize ug P800 ang third prize.
Aduna sab Terranium Arrangement contest kon diin didto himoun ang arrangement sa mga bulak sulod sa dako nga water bottle. Kini adunay premyo nga P8,000; ikaduhang ganti -- P7,000; ug P6,000 ang ikatulo nga premyo.
Nakadayeg si Misamis Oriental Governor Bambi Emano sa talento ug kahibalo sa mga Misamisnon ug nipasalig sab kini sa mga lumad nga hatagan sila og dugang kasadya sa ilang kaugalingon nga kalihokan.
Pagka hapon, usa ka street dancing competition ang gipahigayon kung diin 15 ka mga contingent ang misalmot.
Migawas nga kampiyon sa Street Dancing Competition ang lungsod sa Talisayan ug nibitbit sa mitagaktak nga premyo nga P250,000 nga cash ug P1 million worth nga proyekto sa lungsod.
Niangkon pa kini sa tulo ka mga special award nga dunay tag P10,000 nga premyo nga mao ang Best in Choreography, Best in Storyline ug Best in Musicality.
Si Talisayan Mayor Rommel Maslog nibutyag sa Superbalita Cagayan de Oro nga nalipay siya sa kadaogan sa lungsod.
Apan sa pangutana kung asa idapat ang P1 milyon worth nga proyekto, gibutyag niini nga ila pa kining hisgotan sa Tourism Department sa lungsod karon panahona.
Ang second place naangkon sa lungsod sa Balingoan nga adunay P200,000 nga premyo ug third prize nga P150,000.00 sa Gingoog City.
Ang lungsod sa Sugbongcogon nakaangkon og Best in Costume nga adunay P10,000 nga kantidad.