TRESE lamang ka mga lokal nga panggamhanan sa tibuok Northern Mindanao ang hingpit nga nituman sa waste management labi na pagbaton og sanitary landfill sa ilang mga dapit.
Lakip sa 13 mao ang Damulog, Maramag, San Fernando, Dangcagan, Pangantucan, Lantapan, Manolo Fortich sa Bukidnon; Cagayan de Oro City; Alubijid, Misamis Oriental; Iligan City; Bacolod; Kapatagan; Camiguin cluster.
Gibutyag ni Engr. Florencio Dominguez, Chief Environmental Monitoring and Enforcement division chief sa Environmental Management Bureau (EMB), nga gamay pa lang ang nituman ug daghan pa gyud ang bagsak niini nga balaudnon.
"Ug moingon ka og bagsak sa tibuok Region 10, medyo daghan-daghan pa gyud but they're starting to comply now because gakasuhan man sa Ombudsman ang mga LGUs (local government unitks) nga wala nag-comply," matud ni Dominguez.
Tungod niini, kinahanglan gyud ang hugot nga pag-implementar sa balaod aron nga mapatuman ang mga lokal nga kagamhanan sa gimando labi na nga kini alang man sa kaayohan sa kinaiyahan ug sa tanan.
"Thirteen pa ang naay sanitary landfill. Ang uban nag construct pa, pero kaning 13 apil ang Cagayan de Oro operational na ni siya. Mao ni ang indicator sa full compliance of the law," dugang niini.
Nasayran nga karong bulana, gisaulog ang Zero Waste Month Celebration sa Department of Environment and Natural Resources.