WALA makalusot sa City Local Environment and Natural Resources Office (Clenro) ang duha ka mga sakop sa Roads and Traffic Administration (RTA) human nasapon nga naglabay og basura sa Kiosko, Divisoria mga alas 5:15 sa kaadlawon atol sa pagsugod sa prosesyon kagahapon, Enero 9.
Giisyuhan og ordinance violation receipt ang duha ka mga traffic enforcer kinsa gipugngan una ang mga pangalan.
Sa pakighinabi kang Engr. Armen Cuenca, tsirman sa Clenro, gibutyag niini nga nasapon nga nag-inom og kape ang maong mga RTA ug nasapon nga gilabay lang sa dili insakto nga dapit ang ilang styrofoam nga baso.
"Last nga inom, iya dayong giitsa, ingon ko ayaw sa duoli kay basin moingon nga diha ra nako gibutang sir ako rang ilabay," matud ni Cuenca.
Giingong nagpaabot kini og mga anaa sa singko minutos ug nilakaw ang duha ug mga 10 metros na ang gilay-on ayha kini giduolan ug giingnan sa ilang kalapasan sa ordinansa sa siyudad sa paglabay sa basura bisan asa.
Giingong nangayo usab dayon og pasaylo ang duha.
"Pag-abot nila, nangayo og pasaylo. Ingon ko pasayluon gyud kay ang makasala pasayluon man human nato maserbisyohan o mahatag ang corresponding penalty, P500 kada usa," dugang ni Cuenca.
Gidugang pa niini nga iduso usab kini sa city administrator alang sa tukmang aksiyon.
"Being a City Hall employee, dapat model ta. Aside from bayran nila, ilang e-explain o mosaad sila ba kaha nga di na moutro," dugang pa.
Gibutyag usab ni Cuenca nga mensahe kini nga walay gipili bisan og empleyado sa City hall ug uban pa ang pag-implementar sa balaod sa siyudad.
"Nakita nila nga walay gipili ang pag-implement, katong ganina clear message sa tanan sa tanang katawhan sa dakbayan, bisan pa sa mga bisita," dugang niini.
Giingong depende pa usab kini sa city administrator nga si Teodoro Sabuga-a nga posibleng duna pa silay laing atubangon nga kaso sama sa dili na pag-renew sa kontrata ug uban pa.
Basura minos na
Kun itandi sa mga nilabay nga mga prosesyon sa Itom nga Nazareno, gamay na lang ang nahipos sa Clenro nga mga basura atol sa traslacion.
"Dili na parehas sa una. Sa una, gamay ra ang participants, unya daghan ang basura. Karon, murag na double ang participants pero ang among dala nga garbage bin out of 10, mga unom ra ang napuno," dugang ni Cuenca.
Giingong sagad nga naglabay og basura ang mga wala nag-apil sa prosesyon nga wala usab masapon sa Clenro.
Samtang gipahimangnoan usab ang establisimento nga naglabay og confetti isip parte sa selebrasiyon ug hangyo sa simbahan nga diha maglabay nga dili sila dakpon apan gipahimangnoan nga sa dili pa mag alas 12:00 niadtong Enero 9 wala na ang mga basura.