NAGPRESENTAHAY og mga mapa ang duha ka mga habig sa nalambigit ining gikatakda untang plebisito aron umolon ang bag-ong Barangay Banawa-Englis atol sa husay kagahapon sa korte.
Apan, si Kong. Antonio Cuenco, nangamahan sa balaod nga nagtakda sa plebisito ug nitambong sa husay sa korte kagahapon, namahayag nga way labot ang korte sa paghusay ining problema sa utlanan sa barangay kay ang konseho sa dakbayan sa Sugbo maoy may gahom aron husayon kini.
Si Labangon Councilor Victor Buendia, kinsa nisang-at og petisyon aron makakuhag temporary restraining order (TRO) nga nagpugong sa plebisito niadtong Sabado, maoy unang testigo nga gipresenter sa korte ug nisaysay nga ang Rosalina Village nahisakop gyod sa Labangon ug di sa Barangay Guadalupe.
Gipresentar ni Buendia ang nagkadaiyang mga dokumento nga nagmatuod nga ang Rosalina Village giila nga anaa gyod sa Labangon.
Gani, niawhag siya sa ilang konseho sa Labangon nga ilang tukion kini apan si Labangon Barangay Kapitan Felix Abella nipadayag nga human na sa plebisito nila kini hisgutan.
Dihang gipangutana siya ni Cebu City South election officer Edwin Cadungog kon may gisang-at ba siyang pormal nga petisyon sa konseho sa dakbayan nga nagkwestyon sa problema sa utlanan, nitug-an kini nga nidiretso siya sa korte sa pagsang-at og writ of preliminary injunction.
May dokumento nga dala si Cadungog nga ang konseho sa dakbayan nitumbok nga way reklamo nga gisang-at kanila kabahin sa problema sa utlanan tali sa Guadalupe ug Labangon.
Apan, gipakita sa kampo ni Buendia ang karaang mapa nga nagtumbok kon asa nahimutang ang Rosalina Village nga anaa siya nagpuyo karon ug gipresentar usab sa mga opisyal sa United Banawa Englis Association Inc. (UBEAI) ang ilang gidala nga mapa.
Wa una gidawat sa korte ang gipresentar nga mapa sa duha ka habig apan si Regional Trial Court (RTC) Branch 58 Judge Gabriel Ingles nimando nga sa sunod husay karong Biyernes patambungon ang secretary sa Cebu City Council aron iyang ipresentar ang mapa nga maoy nag-umol sa Barangay Guadalupe ug ang hepe sa Land Management Section sa Department of Environment and Natural Resources (DENR). (JECT)