MURAG naghudyaka ang mga habal-habal drayber tungod kay nagtuo sila nga ka-aprobahan na gayud ang balaudnon sa paghimong legal sa maong sakyanan aron mahimong makapamasahero. Gawas sa Angkas, JoyRide ug Move It, aduna usay balita nga buot usab musod sa Pilipinas ang higanteng motorcycle taxi sa Indonesia nga Go-Jek. Nagpadayon pa hinuon ang pilot run sa Angkas, JoyRide ug Move It nga matapos karong Marso 23.
Human niini, gipaabot nga magpasar na og balaud aron mahimong legal ang motorcycle taxi. Sa pagka-karon, dili pa legal kining pagbiyahe sa mga habalhabal kay nakalapas kini sa Land Transportation and Traffic Code. Anaay upat ka mga senador ang nangamahan og mga balaudnon kalabot sa habalhabal, way labot sa kapin sa usa ka gatos nga samang balaudnon sa Ubos Balay-bala-uranan.
Mao kini ang numero-unong kumpetensiya sa mga taxi. Anaa pa usab ang Grab ug Beep. Tungod sa trapik, daghang gustong magdali nga mosakay sa habal-habal. Mas daku usab ang kita-un sa mga habal-habal driver itandi sa mga taxi driver tungod usab sa mahal nga gasulina. Akong nasayran gikan sa akong suki nga taxi driver, Samson Malusay, nga ang naandan nga abang sa mga bag-ong taxicab gikan sa P1,200 ngadto sa P1,400 ang 24 oras. Mogasto ang drayber niini og kapin kun kulang P1,200. Sa ato pa, kinahanglang mokita sila og P1,500 alang sa abang ug sa gasolina wa pay labut sa ilahang kita-on.
Tungod niini, anaay daghang mga taxi drayber nga nag-drive na karon og habal-habal. Nagkuwang na og drayber ang mga taxi firm. Naa na man gani gikataho nga mga kompaniya sa taxi nga gusto nang manira. Ang ubang taxi operator mohimo og mga paagi aron lang magpabalin ang ilang mga drayber. Naay dili kaayo estriko nga maningil sa abang matag-adlaw basta husto lang ang intrigo matag buwan. Sa day-off usab nila nga matag Dominggo mahimo silang mamasahero diin ang ilang kita ma-ila na.
Human patya sa Estados Unidos (US) ang inilang Gen. Qassem Soleimani nga pangabaga ni Iranian Supreme Leader Ayatollah Ali Khameini misaad ang Iran nga mohimo og grabeng panimawos. Gani ila nang gibombahan og kapin sa usa ka docenang missile ang duha ka mga base militar sa Iraq nga gi-ukopahan sa mga Amerikano ug mga coalition forces. Apan si Iran Foreign Minister Mohammad Javad Zarif mi-insister nga dili sila gusto og gubat apan gihimo nila ang pagpamomba agig self defense sa gihimo sa mga Amerikano. Samtang dili sila gusto og gubat, apan andam sila sa pagdepensa sa ilang kaugalingon sa bisan unsang pagpangataki.
Ako nagtuo nga nakab-ut ni Presidente Donald Trump ang iyang tumong ug tuyo. Mahimong aron mosaka ang iyang popularidad bisan sa iyang gi-atubang nga impeachment o kaha ang paghipus sa usa ka terorista nga daghang gipatay nga mga Amerikano. Angay nga masayran nga ang mga Amerikano magkahi-usa panahon sa gubat. Anha na sila moreklamo kon mangabut na ang body bags nga sudlan sa mga patay’ng sundalo sa ilang nasud. (mannyrabacal1144@gmail.com)