GIPAABOT nga mas alegre ang selebrasyon sa Sinulog karong umaabot Enero 19, 2020 kay gitugotan ni Cebu City Mayor Edgardo Labella ang mga street parties. Apan mga street parties kinahanglan nga gawas sa 100 metros nga radius gikan sa rota sa Sinulog grand parade.
Sa miaging mga tuig, gidili ang mga street parties sulod sa 300 metros nga radius gikan sa rota sa grand parade. Ubos ni Mayor Labella, gipalayo gihapon ang mga street parties og usa ka gatos ka metros gikan sa rota sa grand parade.
Mahimong maglingaw-lingaw apan gilikayan nga magdasok ang mga tawo duol sa lima ka kilometro nga rota sa Sinulog nga magsugod sa N. Bacalso Ave., paingon sa P. del Rosario St., Imus Ave., Gen. Maxilom Ave., Fuente Osmeña, Osmeña Blvd., R.R. Landon St. ug ngadto sa Cebu City Sports Center.
Apan magpabilin ang liquor ban sud sa usa ka gatos nga radius sa rota sa grand parade. Ang mga establisimento nga molapas, matod pa ni Mayor Labella, hayan nga mawad-an sa ilang business permit. Sa laktod, sirad-an ang ilang mga tindahan.
Labaw nang gidili ang mga hubog sa rota sa grand parade. Ang gobyerno sa Syudad magbutang ug mga buses sa General Maxilom (Mango) Avenue ug Osmena Boulevard. Adto itanggong ang mga hubog hangtod nga mahuwasan. Kon makasala, ikiha pa gyud.
Kon mahubog, ayaw na lang og suroy. Maayo pa kadtong hubog nga gipangutana sa pulis, “Unsa, kaila ka nako?” Tubag sa hubog, “Kaila ko nimo. Pulis ka. Ikaw, kaila ka nako?” Tubag sa pulis, “Wa.” Ingon sa hubog, “Ah, ikaw diay ang hubog.”
Gipatuman sab ang gun ban sa Metro Cebu sugod kagahapon. Suspendido ang mga permit to carry firearms outside of residence. Matod pa ni Colonel Engelbert Soriano, officer-in-charge sa Cebu City Police Office (CCPO), aron ni nga way mga kaso sa pagpusil atol sa Sinulog.
Di na sab maglabad ang mga ulo niadtong kusog kaayong mokuha og hulagway sa ilang mga smartphones ug ipost dayon sa social media. Kay di na pawngon ang mga cell sites duol sa parade route.
Matod pa ni Mayor Labella, pawngon lang ang signal sa cellphone kon morekomendar ang intelligence service sa kapulisan ug kon dunay kadudahan nga mga butang duol sa rota sa grand parade.