Nalzaro: Pakyas ba ang drug war?

KON si Vice President Leni Robredo ang pahatagon og grado sa kampaniya sa Duterte administration, hagbong kuno. Tiaw ba nimo kanang 1/100. Pastilan no? Dili lang ubos sa 75 diay ang hagbong nga grado, aduna pa diay 1/100. Mihatag og mga statistic si Robredo kon nganong mao kini ang gihatag niya nga grado. Kay matod pa niya bisan kuno sa subsub nga kampaniya sa administrasyon batok sa illegal nga drugas wala pa gihapon kini mikonhod, midaghan pa hinuon.

Kini bisan pa man sa pagpamatay o extra judicial killings nga gihimo sa administrasyon. Mao kini ang iyang nasuta sa dihang natudlo siya sa hamubo nga panahon sa Inter-agency Committee on Anti-illegal Drugs. Pastilan si Leni og nganong naka-ingon niini? Para nako dili siya maoy haum nga tawo nga mosaway ug mogrado sa anti-drug campaign sa kagamhanan.

Una, naa siya sa oposisyon ug natural lang nga mosaway siya. Alangan man nga modayeg siya nga gitangtang man siyang Duterte. Ikaduha, wala siya makahatag og tukmang statistics sa drugas nga misulod sa nasud kon diin ug asa gikan. Tinuod, nagpabilin ang problema sa drugas apan dili kini masulbad dayon sa usa ka pagpamilok. Dili intawon magikero kana si Digong.

Ang problema sa drugas atong ikatandi sa problema sa insugency ug mMslim rebellion sa Mindanao. Dugay na kanang problema. Nasulbad ba karon? Wala. Anaa gihapon. Pero ang gidaghanon sa mga rebelde itandi kaniadto ug karon, lahi na. At least mikonhod. Kaniadtong panahon ni Marcos grabe ang pagsaka sa rebelyon. Miabot ang mga rebelde og 50,000 tibuok nasud. Apan karon gamay na lang sila kay ang uban nangamatay, naay mibalik na sa sabakan sa balaod.

Mao pod na ang drugas. Kaniadto sa wala pa mahimong Presidente si Digong, grabe kaayo. Apan napatay ug nadakpan ang mga inilang druglords, mikonhod apan naa gihapon. Kadto diay’ng pagpatay nila ni Jeffrey “Jaguar” Diaz, Mayor Onik Espinosa, mga Parojinog ug pagdakop nilang Kerwin Espinosa ug pag-surrender sa uban dili to maisip nga kalampusan? Ang gihimo ni Duterte batok sa drugas mahulog sa kanta nga “Just Once”--”I did my best but my best wasn’t good enough.” At least, naay gihimo kay sa wala. (bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph