NAKAHUMAN na og bayad ang Filinvest Land Inc. sa 19.6 hektarya nga luna nga ilang gipalit sa South Road Properties (SRP) sa balor nga P6.7 bilyones. Niini, masugdan na sa FLI ang ilang proyekto nga ibutang sa SRP.
Niadto pang 2015 naka-down ang FLI uban sa laing duha ka mga land developer, apan hangtod karon wa sila kalihok.
Hapit na mag 10 ka tuig sukad nahuman ang SRP, apan hangtod karon dako pa ang hawan sa dapit. Hinay ang kalambuan. Naapektuhan kini sa pulitika sa City Hall.
Bisan gani ang pagpalit sa FLI, SM ug Ayala sa mga luna sa SRP niadtong 2015, naigo gihapon og pulitika human moasumer si kanhi mayor Tomas Osmeña sa katungdanan sa 2016. Iyang gipapugngan ug himuon untang nulo ang pinalitay sa mga luna.
Sukad pa kaniadto, gusto ni Osmeña nga masunod ang iyang gusto kon unsay buhaton sa mga luna sa SRP. Alang niya, dakong desbentaha ang paagi sa pagbaligya sa SRP ug barato ra kaayo kini. Apan sa iyang termino, way bisan usa ka land developer nga nipalit sa iyang presyo sa luna.
Karong panahuna, kon wa pay pamulitika, hayan dako na og kalambuan ang SRP human sa paglabay sa siyam ka tuig. Hayan liboan na ka mga Sugboanon ang nakapahimus sa kalamboan pinaagi sa mga trabaho ug buhis nga gipangbayad sa mga kompaniya nga nagnegusyo.
Sa kadugay sa paglambo sa mao nga dapit, nahikawan ang mga Sugboanon sa dako ug daghang mga benepisyo nga makuha unta gikan sa SRP. Unya ang gigamit sa pagbayad sa datahan sa Siyudad mao ang salapi gikan sa kaban sa kagamhanan, nga gikan usab sa mga buhis sa katawhan.
Hinaut pang kining mga kalambuan di na masanta sa sigeng pamulitika. Kay kon paharion kanunay ang pulitika, kinabag-an sa luna sa SRP kutob na lang sa danawan. Ang luna di iyaha sa usa ka tawo, kon di iya sa publiko.