MGA pulis sa Davao Region kinsa naghinobra ang gidak-on o dunay mga dagkong tiyan kinahanglan nga mopailawom sa “physical fitness” isip kabahin sa ilang New Year’s resolution human ang Police Regional Office sa Davao (PRO-Davao) subling nagpahinumdom sa mando sa PNP central office nga nagmando sa mga pulis nga maabot ang ilang ideyal nga Body Mass Index (BMI) una mapromotar.
Si PRO-Davao director Police Brigadier General Filmore Escobal nagtataw sa kaimportante sa pagmentinar sa ideyal nga BMI isip mando ni PNP OIC Police Lieutenant General Archie F. Gamboa.
Si Gamboa nagpasidaan sa mga pulis nga iyang isalikway ang “schooling” sa mga pulis kon di sila makaabot ideyal nga BMI. Ang pag-eskuwela mao ang kinahanglan alang sa career advancement ug promotion sa organisasyon sa kapulisan.
Ang polisiya sa kahaom nagtumong nga makubsan ang ihap sa mga dagko nga mga pulis aron nga epektibo nga mohimo sa ilang mga trabaho. Ang maong polisiya naglangkob sa tanang mga ranggo sa pulis.
Samtang ang PRO-Davao nagpadayag sa ilang suporta ngadto sa fitness policy ug nagkanayon nga daghang mga aktibidad ang gipasiugda alang sa mga personahe aron nga malambigit sa kalihukan aron sa pagpromotar sa panglawas ug kabaskog.
Ang buhatan sa rehiyonal nagpasiugda og kalihukang paugnat sa kusog sama sa basketball tournament, badminton challenge, Special Weapons and Tactic (Swat) Competition, ug Paskuhan Fun Run alang sa mga pulis aron nga makab-ot ang ilang tagsa-tagsa ka mga BMI.
Gikanayon sa PRO-Davao nga ang physical fitness test mao ang pasulit nga gihimo matag “birth month” sa usa ka pulis. Ang pasulit nga ihatag mag-agad sa age bracket sa pulis. Kini maglakip sa paglusad og physical exercises sama sa push up, sit up, 3 kilometros nga pagdagan o lakaw ug pull ups.
Alang sa iyang bahin, gisulti ni Davao City Police Office (DCPO) spokesperson Police Captain Rose Aguilar nga nagpasiugda sila og weight loss programs sama sa Zumba dancing matag Martes ug Huwebes ug CrossFit activities sulod sa ilang headquarters alang sa ilang mga personahe bisan pa sa wala pa migawas ang nahisgutang mando.
Ilang gisugdan ang kalihukan niadtong Oktubre sa miaging tuig. Ila na sab nga gisusi ang mga personahe kinsa gikonsidera nga iprayoridad sa maong programa.