DUGAY na nga nangandoy si Alberto nga makadaog sa lotto aron mahaw-as sa kalisod pinansiyal nga giatubang niya kanunay. Upat iyang anak: duha ka lalake ug duha ka babaye. Ang kinamaguwangang lalake, si Tred, naa na sa ikatulong tuig sa Accountancy. Sunod niya si Regor, naa sa unang tuig sa Civil Engineering. Ang duha ka babaye nga nagsunod sab anaa pa sa hayiskol. Si Arlyn mo-gradwar karong tuiga sa Senior high school. Ang kinamanghuran, si Chique, Grade 10 pa. So, inig-abli sa klase sunod tuig, tulo na ang iyang mga anak nga motungha sa kolehiyo. Kawton na pod unya niya ang iyang ulo bisan dili katol. Mosamot gyud ang iyang pagka upaw kon asa mangita og ikasustento sa pag-eskuyla sa mga anak. Maayo man gani kay may gikatabang si Estela pinaagi sa buy-and-sell. May mga silingan ug kaila nga nagkinahanglan og mga gagmay nga butang sa panimalay sama sa rice cooker, kaldero, radyo, bentilador, ubp. Paliton kini ni Estela sa Mall ug padata-datahan sa nag-order nga naglakip sa 30% nga patong. Naka-bangkilya kini sa iyang suweldo isip sekyu sa usa ka unibersidad.
Sa iyang pagpalit og tiket sa lotto kada adlaw kutob lang sa 3-digit ang iyang nadag-an nga iya ra pong ipalit og tiket. Kausa nakadaog siya sa ‘suertres’ apan ‘rumble diyes’ ug P750 ra ang premyo. Kon ‘straight’ pa unta, P2,500 ang iyang dag-on. Pero naa siyay gi-menteyn nga numero sa lotto nga pirme niyang ilakip kon mopalit siyag duha ka tiket. Ang numero kay (04) (16) (19) (42) (09) (44). Dako na siyag nagasto ining numeroha. Subra na sa usa ka tuig nga gipalit niya kini matag adlaw. Diha ganiy mga higayon nga nakahukom siya nga biyaan niya kini ug mag-menteyn og laing numero. Apan nahadlok siya nga mobiya ning numeroha kay simbako uroy kon biyaan niya kini unya modaog hinuon! Mao nga gukod sa lupad sa iyang pangandoy, nagpaitom siya. Gipalit niya kada adlaw ang maong numero.
Usa ka gabii samtang nanghigda sila si Alberto ug si Estela sulod sa ilang lawak nag-estoryahanay sila.
“Hon, sunod tuig di lang usa nato pa-eskuylahon sa kolehiyo si Arlyn, kay maglisod gyud ta. Patiwason nato una si Tred kay gradweting man siya sunod tuig. Pwede pod paundangon nato og usa ka tuig si Regor aron di ta mabug-atan sa gasto,” matod ni Alberto.
“Kausik sa tuig nilang Regor ug Arlyn anang kalakiha, Hon!” ni Estela nga milingi sa iyang bana.
“Usik lagi ang tuig nga dili sila ka-eskuyla, apan wa man tay mahimo, gawas tingali kon matuman ang akong pangandoy nga modaog sa lotto,” ni Alberto nga mitutok sa kisame samtang naghunahuna sa gi-menteyn niyang numero ug nag-ampo nga modaog na unta kini.
Miabot ang tingbakasyon sa saring. Nag-miting ang pamilya ni Alberto human sa ilang panihapon nianang gabhiona. Gisultihan sa magtiayon ang ilang mga anak bahin sa ilang hukom nga dunay dili maka-eskuyla sunod ting-abli sa klase.
“Regor, Arlyn, kinahanglan mo-sakripisyo kamo. Si Kuya Tred ninyo atong patiwason.Total inigkahuman niyag eskuyla, makatrabaho na siya ug makatabang na siya sa pagpadayon ninyo sa kolehiyo. Okey?” ni Alberto.
“Okey ra ko, Pa!” ni Regor.
“Okey pod ko, Pa,” ni Arlyn, pero wa malilong kang Alberto ang kahinukgo niini.
Usa ka buntag niana didto sa unibersidad nga gialagaran ni Alberto. May mga mantalaan nga gihatod sa ‘newsboy’ nga iyang gidawat. Sama sa naandan gipakli niya ang panid sa Superbalita diin nahimutang ang mga numero nga mananaog sa lotto. Nanagko ug misiga ang iyang mga mata pagkakita niya sa midaog sa Lotto 6/45 nga maoy iyang gipustaan kagahapon. Nasulod ang tanan niyang numero bisag wa magsunod: (04) (09) (42) (44) (16) (19). Ang premyo: P31, 127, 284.40. (KATAPUSAN)