GIHAMOK og gamayng kasikas ang pagbisita sa Spurs didto sa teritoryo sa Celtics sa dihang gipukan sa San Antonio ang Boston, 129-114, sa National Basketball Association. Nalangan sa makadiyot ang panagsangka sa dihang usa ka lata sa beer gikan sa grandstand ang mitugpa atubangan sa bench sa San Antonio. Gihuwat pa og pipila ka minuto nga malimpiyohan ang korte ug sa samang higayon gibadlong sa announcer ang publiko sa dili pagbuhat sa ingon. Usa ka dumadapig ang gitumbok nga giingong maoy naglabay sa beer ang giaresto. Nahitabo kini sa dihang na-ejected si Kemba Walker tungod sa reklamo niini nga wa matawagi og foul ang iyang lusot sa third quarter. “I thought I was being nice,” saysay ni Walker, kinsa two-time winner sa Joe Dumars Award for sportsmanship sa NBA. “I thought the ref missed the call. ... The rest is history.” Wa usab makauyon ang forrward sa Boston nga si Gordon Hayward sa nahitabo. “We can’t have that,” ingon ni Hayward. “I love our fans. I love our passion. But we’ve got to stay away from that.” Ang kasamok nga gilamasan usab sa pagka technical ni Celtics coach Brad Stevens nakaputol sa rally sa Boston nga nagpahak sa 22 puntos nga labaw sa Spurs, 76-69. Si LaMarcus Aldridge mipasulod sa unang duha ka technical free throws. Nasipyat man tuod ang iyang ikatulong itsa sa free throw line apan nakuha sa iyang kauban nga si Derrick White ang bola kinsa gi-foul usab dayon niadtong higayona. Kalmadong gipasulod ni White ang free throws aron pagbingat og balik sa labaw, 80-69, ug gikan niini wala na gyud makasikit pa ang Celtics. Si DeMar DeRozan mitali og 30 puntos aron pangulohan ang Spurs. Si Gordon Hayward mipaksit og 18 samtang 16 puntos usab ang natigom ni Jaylen Brown alang sa Boston kinsa nakaangkon sa ilang ikaduhang sunodsunod nga pildi. Si coach Stevens mibutyag nga nangayo siya og pasaylo ni Spurs coach Greg Popovich human sa duwa. “I told Pop after the game I’m really sorry that they had to experience that,” matod ni Stevens ngadto sa mga reporter. “I hope that person’s not allowed in an NBA arena again.” Sa laing mga duwa, gipasulod ni Serge Ibaka ang iyang duha ka free throws nga maoy naghatag sa defending champion Toronto Raptors og 112-110 nga kadaugan batok sa Charlotte Hornets, gipagtong sa Miami Heat ang Indiana Pacers, 122-108, samtang gilubong sa Magic ang Wizards, 123-89. Gipasulbongan usab sa Houston Rockets ang Atlanta Hawks, 122-115, ug gipakaging sa Nuggets ang Mavericks, 107-106. Giputlan sa Pelicans og sungay ang Bulls, 123-108, ug gipakuratsa sa Utah Jazz ang New York Knicks, 128-104. Gipukan sa Bucks ang Warriors, 107-98. (JBM)