NAGPADAYON ang gamayng kahayag sa Cebu-Casino Ethyl Alcohol nga miiwag sa ilang dalan paingon sa playoffs human nila mabuntog ang Quezon City Capitals, 95-89, sa 2019-20 Chooks-to-Go MPBL Lakan Season sa Cuneta Astrodome, Miyerkules, Enero 8, 2020.
Ang kadaugan mipasaka sa ilang record ngadto sa 11-12 nga mihaom sa ikasiyam nga luna sa South Division.
Sikit nilang gisundan ang ikawalo ug anaa sa katapusang puwesto sa playoffs nga mao ang Bicol-LCC nga may 13-12 nga baraha.
Ang 11-4 nga rally sa Cebu nga giduslitan sa mid-range jump ug tres ni Raffy Oktubre sa katapusang 2:16 nga nahabilin sa duwa maoy nagtiklop sa paglaom sa Capitals.
Si Will McAloney ug ang kanhi University of San Jose-Recoletos standout Fletcher Galvez maoy nangulo sa Cebu-based squad pinaagi sa ilang 17 puntos matag usa.
Si Oktobre hapit maka double-double ug mirehistro kini og nuebe puntos ug may 11 ka rebounds.
Ang kapildihan nagduot sa Capitals ngadto sa ika-11 nga dapit nga may 10-16 nga baraha. (JNP)