GIANGKON ni Meralco headcoach Norman Black nga anaa permi ang bintaha sa Barangay Ginebra bisan asa man ang duwa.
Kini gumikan kay anaa permi sa ilang kiliran ang mabagang dumadapig.
Usa usab kini sa mga rason kon nganong lisod sila pildihon.
Pero alang kang Black, wa kini nila igbali. Ug andam sila bisan asa ang duwa.
Karong gabii, motapon ang Game Two sa ilang PBA Governor’s Cup best of seven finals sa Quezon Convention Center sa Lucena.
“There’s always an advantage for Ginebra whenever they go anywhere in the country. Normally fans follow them. In Araneta, we can probably get 4,000 or 5,000 fans in the gym, then they will have 12,000, 15,000. When we go to the province, that’s a little bit more difficult for us,” padayag ni Black.
“We’ll see. Anyway, we have to win this game. It’s a must win for us; it really won’t matter where we play,” dugang sa beteranong coach.
Sa Game One niadtong Martes, atubangan sa dul-an 11,000 ka mga misaksi sulod sa Smart Araneta Coliseum, ang Gin Kings mi-rally sa fourth quarter ug misakmit sa makutas nga 91-87 nga kadaugan.
Taliwala sa kadaugan, ang Ginebra import nga si Justine Brownlee mipadayag nga iyang nalantawang nga dili sayon nga dalan ang ilang latason sa tibuok series.
Mao usab kini ang pangagpas ni Ginebra Coach TIm Cone.
“I honestly feel this is the way it’s going to be every game. It’s going to be a grind-it-out, fight to the end and see who comes out on top in the last couple of minutes,” matod ni Cone.
Gani una na niyang gihulagway nga ang series daw og sama sa usa ka ping-pong nga magpulipuli og hapak ang mga nagduwa niini.
“It might be five or six-point game but the rhythm and the struggle for every possession will be the same all the way through,”ingon sa multi-titled coach.”Meralco is so disciplined in the way they are playing, it’s really hard to get out of their tempo.”
Ang kapildihan sa Game One wa makatarog sa determinasyon sa kinatibuk-ang puwersa sa Bolts. Hiniusa ang ilang hunahuna karon ug kini mao ang pagbawos sa Game Two. (JBM)