DAKO ang pagsalig ni Roel Rosauro nga iya nang makutlo ang una niyang kadaugan sa ONE Championship karong gabii, Biyernes, Enero 10, 2020 sa iyang pagpakigsangka batok sa beteranong Indonesian nga si Yohan Mulia Legowo sa curtain-raiser sa ONE Championship - “A New Tomorrow” sa Impact Arena sa Bangkok, Thailand.
Sukad sa iyang unang away sa pinakadakong mixed martial arts (MMA) organization sa Asia niadtong 2018, si Rosauro wala pa makatilaw og daog sa duha ka duwa.
Una, napildi siya ni Li Kai Wen sa Pebrero 23, 2018, pinaagi sa guillotine submission ug dayon napukan usab siya pinaagi sa unanimous decsion Sunoto nianang pagka Mayo.
Nanghinaot si Rosauro, lumad nga taga Camotes, nga mausab na ang timplada sa iyang karera ning higayona batok ni Legowo kinsa nakaangkon na usab og sunodsunod nga kapildihan sa iyang uwahing mga away.
“Siyento porsiyento ang atong pagsalig pero di gyud ta angay mokompiyansa kay kini ra bang MMA di matag-an. Daghang mahitabo sa one round,” matod sa founder sa Yaw-Yan Ardigma Cebu nga si CEO Benigno “Ekin” Caniga.
Ang 39-anyos nga Legowo ang napildi sa uwahi niyang upat ka away. Ang katapusan mao ang first round stoppage sa mga kamot ni Phoe Thaw, kinsa sa sama ni Rosauro usa usab ka striker. Ang 31 nga Rosauro adunay 4-3 nga baraha samtang si Legowo, 8-8. (JBM, EKA)