AMAHAN ug iyang anak nga babaye lakip sa nadakpan sa mga buy-bust sa kapulisan sa Huwebes sa kaadlawon, Enero 9, 2019.
Si Police Major Elizandro Quijano, hepe sa Abellana Police Station, kuyog ang iyang mga sakop sa Drug Enforcement Unit (DEU), nihimog buy-bust sa Osmeña boulevard sa habig sa Sitio Bugnay, Barangay Santa Cruz, Siyudad sa Sugbo.
Ang mga nasikop mao sila si Lyan Esdrelon, alyas Kaging, 19,ug amahan niini nga si Leonard Esdrelon, alyas Junard, 45,ug silingan nga si Jeremy Arnibal, alyas Bayot, 20, mga lumolupyo sa lugar.
Ang tulo gi-bust nila ni Quijano nga niresulta sa pagkasakmit sa mga bulto sa illegal nga drugas nga moabot og 300 gramos nga dunay balor nga P2 milyunes base sa Dangerous Drugs Board (DDB) value.
Dugang pa ni Quijano nga makonsiderar nga high value target si Leonard samtang ang anak nga babaye bag-ohay lang nila nahibal-an.
Si Leonard nadakpan na kaniadto sa kasong paghupot og drugas, apan nakagawas human maserbisyohi ang iyang kaso.
Samtang ang anak niini nga babaye nga dungan nga nadakpan uban sa iyang amahan maoy target nila sa buy-bust human gitudlo ni Arnibal nga maoy unang nadakpan atol sa ilang follow -up operation.
Samtang si Santa Cruz Barangay Captain Jerome Lim nga nahinabi sa Superbalita Cebu niingon nga si Leonar ila nang gitokhang, apan wa motahan.
Dugang ni Lim nga anaa na sa ilang Barangay Anti Drug Abuse Council (BADAC) watchlist si Leonard.
Samtang si Arnibal gihulagway sa kapitan nga sakit sa ilang ulo tungod sa sige nalang og balik-balik nga madakpan sa iyang mga barangay tanod tungod sa pagpangawat.
Ang gikaproblemahan tungod kay way moreklamo.
Samtang sa laing buy-bust, nadakapn si Crisanto Papasin, 50, taga Purok 8, Barangay Kamputhaw, Siyudad sa Sugbo.
Si Papasin nasakmitan og shabu balor og dul-an P200,000.
Si Papasin nadakpan sa City Drug Enforcement Unit sa Cebu City Police Office.
Lakip sa nadakpan ang duha ka mga manag silingan nga sila si Emiritus Billeno, 56,ug Tony Genses Llamedo, 51, pintor.
Katapusan nga nadakpan mao si Marlito Amamag-id, 29, panday, taga F.Villa st., Barangay T. Padilla ning siyudad.
Si Amamag-id nakuhaan sa Parian Police og mga P40,000 nga balor sa shabu. (BBT)