HUMAN sa pagpahawan sa mga obstruction sa city ug municipality roads, mohatag og bag-ong mando ang Department of Interior and Local Government (DILG) nga ang kadalanan sa kabarangayan nasab ang hinloan ug hapsayon.
Mao kini ang gibutyag ni Atty. Ian Kenneth Lucero, hepe sa DILG-7 Local Government Monitoring and Evaluation Division, dihang nahinabi sa Superbalita Cebu. Matod niya nga adunay umaabot nga mando nga maghatag og 75 ka mga adlaw sa tanang mga barangay nga hawanan ang kadalanan, labi na ang agianan sa katawhan.
“Karon is focused in the barangays as pronounced by the central office. So, we are waiting for the guidelines pero mao na ang initial nila nga 75-day period,” sigon ni Lucero.
Sa miaging tuig, adunay mando si Presidente Rodrigo Duterte nga ang tanang kadagkoan sa mga local government unit (LGU) mohawan sa mga dalan. Kon di kini nila mapahawanan sulod sa 60 ka adlaw, mamahimo silang pasakaan og kaso sa pagpabaya sa ilang katungdanan.
Anaa nay 10 ka mga mayor nga gipasakaan og kaso sa DILG.
Karon nga gipalapdan na ang road clearing ngadto sa mga barangay, kon adunay mga kalapasan sa wala pagsunod sa mando nga hawanan ang kadalanan sa barangay, ang mga kapitan na manubag niini.
“Sa barangay level na but they can ask for the assistance of the city local government kay kahibawo man ta nga kuwang og tawo gyud kon mag-road clearing. So, they can ask assistance,” sigon ni Lucero.
NAG-UNA
Apan bisan pa nga nagpadulong pa ang mandato sa DILG nga lakip na sa road clearing ang mga barangay road, ang dakbayan sa Mandaue nagsugod na sa pagpanghawan sa kadalanan ug mga sidewalk sa barangay sa miaging tuig pa.
Si Edwin Jumao-as, pangulo sa Mandaue City Legal Enforcement Unit (MCLEU), niingon nga nagsugod na sila sa pagpanghawan.
Gani, tanang 27 ka mga barangay sa dakbayan ila nang nasugdan og hawan, apan bag-o lang sila nagsugod sa ilang pag-turnover.
Ang pamaagi sa MCLEU nga sila ang mohawan una sa mga barangay road ug makigtambayaong sa mga barangay kapitan, opisyales ug mga tanod aron ma-orient sila kon unsay pamaagi sa ilang paghawan sa mga dalan.
“Sugdan namo, pero sila na ang motiwas. So, mobalik mi ngari kon magkinahanglan na sad og legal matters kon dili nila kaya,” sigon ni Jumao-as.
Karong bag-o lang nag-turn over ang MCLEU ngadto sa Barangay Tipolo human makatuman sa requirements sa MCLEU, lakip na niini ang barangay resolution nga maghimo og barangay road clearing task force ug inventory sa tanang obstructions sa kadalanan sa ilang barangay.
Sa 27 ka mga barangay sa Mandaue City, aduna pay pito ka mga barangay ang naka-comply. Kini naglakip sa Barangay Subangdaku, Tipolo, Banilad, Guizo, Mantuyong, Canduman ug Casili. Ang ubang mga barangay, sigon ni Jumao-as, nisaad kini nga mohatag sa ilang requirements ngadto sa MCLEU karong semanaha.
Si Romana Cuizon, kapitan sa Tipolo, niingon nga isip kapitan, aduna gyuy kahadlok nga mobuhat sa maong mando labi na kon adunay mga lumulupyo nga mangisog ug mosupak. (KFD)