UPAT ka mga tawo ang kritikal nga gipangdala sa ospital human sila mabangga samtang nagmotorsiklo sa dakbayan sa Lapu-lapu kagahapon sa mga alas 3 sa kaadlawon.
Gituohan sa mga nakasaksi sa hitabo nga nakainom ang mga biktima kay kusog ang dagan sa motorsiklo sa wa pa kini mabangga sa center island padung sa ikaduhang taytayan sa Mactan-Mandaue.
Usa kanila ang naputlan sa tiil, diin panit ug pipila ka gituohang mga tipaka sa bukog ang nahabilin sa may eskina sa Maximo Patalinghug ave. ug ML Quezon highway sa mao nga dakbayan.
Ang nangaangol mao sila si Lionel Esdrelon, 30, taga dan Cabreros, siyudad sa Sugbo; John Michael Echavez, 29; Lizelda Vullo, 30, pulos taga Lapu-lapu city ug backrider sa motorsiklo (plate number 9952) nga gimaniho ni Oliver Tamang, 37, taga Osmeña Boulevard, dakbayan sa Sugbo.
Sa pasiuna nga imbestigasyon nga gihimo ni SPO2 Jose Roel Nalzaro, nasayran nga kusog nagdagan ang motorsiklo ni Tamang paingon sa Mandaue Mactan Bridge.
Apan pag-abot sa dapit, kalit lang niliko ang driver paingon sa railings sa dalan.
Nangalabay ang mga biktima dul-an sa 10 metros ang gilay-on tungod sa kakusog sa impact.
Atol sa hitabo, way bisan usa nga sakay sa motorsiklo ang nagsul-ob og helmet, matod ni Nalzaro.
Inay ipangsul-ob, ang duha ka mga helmet igo lang gikaw-it sa motorsiklo manubela sa motorsiklo.
Si Esdrelon nagrabihan human masangit ang iyang tuo nga tiil sa railings ug bugtong panit na lang ang nahabilin sa iyang tiil.
Ang ubang parte sa iyang tiil nasangit ug nitusok sa railings.
Dugang nasayran sa kapolisan, pipila ka mga tawo nga nitan-aw sa mga biktima human sa hitabo nihulagway kanila nga mga model tungod sa ilang bayhon. (JFT)