HAPON uban sa iyang hinigugma nga Pinay gitulis ug gipanggapos sulod sa ilang giabagangan nga lawak sa usa ka beach resort sa lungsod sa San Remegio, Sugbo.

Nahitabo kini sa usa ka hotel and resort sa barangay Bancasan, pasado alas 12:00 sa tungang gabii niadtong Lunes.

Ang mga biktima giila nga sila si Akihito Fukuhara, 52, Japanese national, ug Stephanie Recablanca, 20, taga barangay Pajo, dakbayan sa Lapu-Lapu.

Click here for Election 2010 updates

Sigun sa ilang asoy ngadto sa kapulisan nga adunay nituktok sa ilang lawak nga gipuy-an sa beach resort sa dihang ilang giablihan, duha ka wa mangailhing mga tawo ang ningsulod dayog tion sa armas ug kutsilyo.

Gipanggapos ang duha gamit ang pisi dayog kuha sa ilang bag nga adunay sulod nga usa ka gatos ka libo nga yen, cell phone pitaka ug uban pang importanting mga butang.

Ang duha ka wa mailhing mga tawo daling nisibat biniyaan ang duha nga gipanggapos.

Hinuon nakabuhi ra usab ug ilang gi-report ngadto sa management ang nahitabo kanila.

Samtang si Senior Supt. Erson Digal, pangulo sa Cebu Provincial Police Office (CCPO) nimando na sa hepe sa San Remegio Police Station nga palawman ang imbestigasyon.

Ang kapulisan wa mosalikway sa posebildad nga inside job ang maong hitabo.

Matod niya nga kon di man inside job, posebling usa sa nag-abang sa maong beach resort maoy responsable tungod kay pribado man ang maong dapit ug di bastabasta nga masudlan ni bisan kinsa.

Samtang usa ka opisyal sa resort nga nahinabi sa Sun.Star Superbalita apan di gusting nganlan, niingon nga una kining higayon nga nahitabo sa ilang establisemento.

Iyang gisalikway nga inside job ang nahitabo.

“Ngano gung moingon silang inside job? Unsa may basihanan nila?,” matod ni Karen Aldava, assistant manager sa ilang opisina dinhi sa dakbayan sa Sugbo.

Siya niseguro nga nipahigayon silag kaugalingong imbestigasyon.

Sa iyang pamahayag, ingon sa iyang gibasol si Recablanca sa hitabo.

Matod sa ilang staff nga ang babayeng guest nagsigeg gawas sa ilang resort bisan tungang gabii na.

Gani, nahibung ang ilang mga staff niini nga unta lawom na man kaayo ang kagabhion.“Nagsige na siyag panghuwam og flashlight sa among usa ka staff. Unsa may gisigehan niyag gawas?” matod sa opisyal.

Siya niingon nga maayong susihon usab sa kapulisan ang kuyog nga mga babaye sa Hapon tungod kay aduna man silay laing kuyog sulod sa lawak. Iyang giklaro nga kon tuyoan gyud og sulod ang ilang beach resort sa wa mailhing tawo mahimo kini agi sa baybayon.