USA ka lalake nga gituhoang dunay deperensya sa pangisip ang napalgang walay kinabuhi sa mingaw nga lugar sa Barangay Puente, lungsod sa Carmen kagahapon, Biyernes, Enero 10.
Ang hepe sa Carmen police station, Police Major Roger Quinano, nitug-an sa Superbalita Cebu nga usa ka mag- uuma nga si Vicente Kyamco Sugarol ang nitaho bahin sa napalgang patay nga lalaki.
Sa pagresponde sa kapulisan sa Carmen, gitudlo sa mag-uuma nga ilang naabtan ang biktima nga ginapos ang duha ka bukton sa nylon nga pisi ug gipanitan na ang nawong paingun sa liog niini.
Gilugit usab ang duha ka kalimutaw sa mata ug gigulgul ang ubol-ubol niini nga gituohan nga gigamitan kinig hait nga kultsilyo.
Wala silay nakita nga samad sa lawas gawas sa paggulgol sa liog ug pagpanit sa nawong sa biktima.
Ipaubos usab nila sa autopsy ang lawas sa lalake nga wala pa mailhi hangtod ning pagsuwat aron masayran kanus-a gipatay ang biktima.
“Mao ni problema kay kay wala mi kakitag dinunggaban sa lawas murag diri gyud sa ubol-ubol ang giuna kay wala may dinunggaban sa lawas,” matod ni Quijano.
Mga residente sa dapit mitug-an nga kanunay nila makit-an ang maong lalake sa ilang lugar nga mag-brief lang ug wala nila mailhi ang pangalan niini nga ilang gihulagway nga adunay sakit sa pangisip.
Nag sul-ob lang og t-shirt nga blue ug nag-brief lang kini ug dili na mailhan ang panagway sa biktima tungod kay bukog na lang ang makita sa panagway niini.
Walay bisan usa ka saksi nga mihatag sa iyang kasayuran sa kamatayon sa biktima.
Dugang ni Major Quijano nga mihimo pa sila karon og imbestigasyon aron mailhan ug kinsa usab ang naghimo sa linuog nga pagpatay sa maong lalake.
Usa sa ilang gitan-aw nga motibo mao ang nasaypan lang ang biktima nga usa ka dautang tawo tungod sa kasayuran nga ilang nasayran nga mag suroysuroy kini sa mga kabalayan nga naka brief lang panahon sa kagabhion.
Apan wala usab wad-a ang posibilidad nga aduna gyuy nag tinguha nga patyon kini.
Nakig-alayon karon ang Carmen Police Station sa kapulisan sa siyudad sa Danao kung aduna bay kalambigitan ang insidente sa nahitabo sa sitio Agutayan, barangay Lawaan sa maong siyudad niadtong miaging tuig.
Diin usa usab ka mag-uuma ang gipatay nga si Tridinidad Roble Batucan ug gipanitan ang nawong sa mag suong Bueno.
Napatay sa engkwentro sa mga police ang duha ka magsuong Bueno nga silang Junrey ug Jovie samtang nadakpan sa mga sakop sa National Bureau of Investigation sa siyudad sa Davao ang manghod nga si Jonas. /
[Kini nga balita nag-develop pa. Mamahimong i-refresh ang page o mag-log-on sa www.sunstar.com.ph alang sa lab-as nga mga balita.]