Call center agent gitulis; motorsiklo nakuha

Tampo nga hulagway.
Tampo nga hulagway.

NAKUHA ang motorsiklo sa call center agent nga si Elisier Pontillas human gitulis sa duha ka wala pa mailhing lalaki sa dan Gov. M. Cuenco Avenue sa Barangay Banilad, dakbayan sa Sugbo, alas 5:10 sa buntag, Enero 10, 2020.

Matod ni Pontillas pipila ka minuto human mihunong siya aron mupadala og mensahe sa iyang cellphone, duha ka mga lalaki nga pulos naka-helmet ang kalit nga mition og kutsilyo niya.

Sa kahadlok sa biktima, miambak kini gikan sa iyang motor ug nakaangkon og pangos sa lawas human naumod sa semento.

Sa paglingi ni Pontilla nakuha na ang motor niini nga Yamaha Mio nga kolor Matte Orange/Black nga adunay plate number 0701-818544.

"Nagdalidali gayud ko sir kay late nako, ang ending wala na gayud hinuon ko ka-duty," asoy ni Pontillas.

Ang motor usa pa ka tuig kaniya ug impasunon pa kini.

Human sa maong insidente, misutoy ang mga mamumuno paingon sa Talamban area.

Gibutyag sab ni Pontillas nga kanunay na niya nga rota ang dan Gov. M. Cuenco Avenue gikan sa Canduman sa dakbayan sa Mandaue paingon sa iyang trabahoan nga nahimutang sa IT Park.

Padayon pa ang imbestigasyon sa Mabolo Police Station kalabot sa maong insidente. (BBT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph