GIINGONG dili mominos P200,000 nga kantidad ang nawala sa opisina ni suspended Zapatera Barangay Captain Francisco Benedicto hinungdan nga iyang pasakaan og kaso ang mga opisyal sa barangay nga misulod niini nga walay pagtugot niya.
Matod ni Benedicto, illegal ang pagsulod sa mga opisyal sa maong opisina ug gani ikiha niya kini ug dili undangan hangtod mauli ang kwarta.
Ang maong kwarta, sigon niya, gigahin unta para sa Christmas party sa mga opisyal sa barangay . Gamiton unta kini pang raffle, cash prizes ug uban pa.
Nagpakuyog si Benedicto sa kapulisan sa Parian Police Station miadtong Enero 8, sa barangay hall alas dos sa hapon para pangitaon sa opisina ang kantidad nga gibutang kuno niya sa honus apan wala na kini makit-i.
Si Acting Barangay Captain Juan Flores Jr., sa iyang bahin, niingon nga wala nila gamita ang maong opisina sukad pagsuspenso ni Benedicto.
“Naay time nga naablihan namo, mga 27 (sa December) tingali to tungod kay naa man gu’y mga unplugged wirings bitaw. Unya kahibaw ta nga ang December taas kaayong bakasyon,” matod ni Flores.
“Ikaw, logically, as human being naa kay dakong kwarta ingon ta P200,000, ibilin nimo diha? How safe is it, really? And how true nga ang iyang gi-claim nga naay kwarta?” sigon ni Flores.
Matod niya, ang pangutana diin si Benedicto og ingon-anang kantidad ug kinsa ang nagsulti og bakak.
Wala gibabagan ni Flores si Benedicto nga mosulod sa opisina tungod kay naa ang presensya sa kapolisan isip witness.
Apan ang pangutana ni Benedicto kon asa gikan og kopya sa yawe sila ni Flores nga sa iyang pagkahibalo siya ra ug iyang apo ang naa niini.
Sa pagsuwat karon, wala pay tubag si Flores mahitungod sa pahayag ni Benedicto.
Gisuspenso si Benedicto og duha ka buwan tungod sa sexual harrassment ug graft and corruption complaint nga gisang-at batok kaniya. / Mae Fhel Gom-os, USJ-R intern