LIGA ng mga Barangay Cebu chapter president ug Provincial Board ex-officio Member Celestino Martinez III nagkanayon nga gikinahanglan una nga adunay tukmang guidelines sa pagpahawan sa kalsada sa barangay sa dili pa sugdan ang clearing period.
Nagtuo si Martinez nga motumaw ang kalibog o problema ilabi na niadtong adunay isyu sa luna ilabi na niadtong privately-owned nga wa pay tino nga donasyon.
Laing gikabalak-an kadtong mga luna nga wa pa maklaro ang utlanan ug uban pang suliran.
Nakita sa maong opisyal ang kabililhon sa maong tinguha sa paghawan sa public roads ang nagkinahanglan gihapon og abag ang mga barangay officials ngadto sa local government units (LGU).
“Although the barangays can further assist in its implementation and enforcement, we are still dependent upon the local executives in any LGU,” reaksiyon ni Martinez ngadto sa mga tigbalita pinaagi sa text message kagahapon, Biyernes, Enero 10, 2020.
Samtang si Cebu City Mayor Edgardo Labella misaad nga moabag ngadto sa mga barangay kapitan sa higayon nga ipatuman ang ang 75-day period sa paghawan sa kalsada.
Sumala pa ni Labella nga dako og ikatampo ang mga kapitan sa maong tinguha ilabi na nga sila maoy mas nasuheto sa ilang tagsa-tagsa ka mga barangay, itandi sa City Government and Prevention, Restoration, Order, Beautification, and Enhancement (Probe).
Sa sayo pa, ang Department of Interior and Local Government (DILG) gikatakdang mopatuman og bag-ong kamanduan ngadto sa kabarangayan sa paghinlo ug hapsayon ang kalsada sa ilang tagsa-tagsa ka hurisdiksiyon. / RTF, JJL, FVQ