USA ka 4-anyos nga batang babaye ang giingong gilugos sa iyang silingang 25-anyos niadtong Enero 4, Sabado.
Gipugngan ning mantalaan ang pangalan sa suspek ug biktima gumikan sa pagka sensitibo sa kaso. Nahitabo ang insidente sa Baranay Mactan, Lapu-Lapu, alas 4 sa hapon.
Matod ni Police Senior Master Sergeant Lorgina Sayson, imbestigador sa Mactan Police Station sa Lapu-Lapu City Police Office (LCPO), ang 4-anyos giingong gihaylo sa 25-anyos nga si “Jason” (dili usab tinuod pangalan human wala pa makuha ang iyang habig) og kwarta human nga nagduwa kini og computer sa internetan. Giingong miuban ang bata sa panimalay ni Jason ug didto nahitabo ang pagpanglugos.
Nisumbong ang 4-anyos ngadto sa iyang igsuon ug inahan hinungdan nga dali usab kining giubanan ngadto sa police station.
Gisikop sa suspek kinsa diha ra usab sa ilang pinuy-anan ug wala mosibat.
Kasong statutory rape, o ang pagpanglugos sa usa ka menor de edad, ang gisang-at sa kapulisan batok sa suspek.
Gumikan sa kahadlok sa pamilya sa 4-anyos sa pamilya sa suspek, nidangop sila sa buhatan ni Lapu-Lapu City Mayor Junard Chan.
Kini human giingong gihulga sila sa pamilya sa suspek.
Nipasalig si Chan ngadto sa pamilya nga dili mahadlok sanglit iyang mandoan ang kapulisan sa pagsiguro sa ilang kaluwasan.
Matod sa mayor, ang maguwang untang 8-anyos ang gi-interesan sa suspek dihang nahinabi niya ang mga ginikanan sa biktima apan giingong nakadagan kini.
Dili prominente o inpluwensyado ang kabanay sa suspek, sumala ni Chan.
Ang kapulisan padayon pa usab nga nagkuha ug impormasyon kalabot sa background sa suspek. / GCM