Albor: Ecstacy makamatay

USA ka party drugs ang ecstacy.Gikan sa Mexico ug U.S. unang gigama sa pharmaceutical alang sa maayong katuyoan ilabina sa pagpalagsik sa lawas. Apan gisundog, giusab ug gituyo sa paggama nga susama gihapon og pills, tablitas o capsule nga gisagolan na og shabu, viagra ug ubang isog og baho nga kemikals. Isagol sa ilimnong makahubog. Kasagarang mogamit sa ecstacy kadtong mga anak og adunahan sanglit mahal.

Maoy namatyan sa 19 anyos nga si Ashley Abad atol niadtong concert sa bisperas sa Sinulog sa miaging tuig human makatomar og ecstacy. Na-overdose kay kalit lang nalup-og ug didto na sa ospital mamatay. Gumikan sa kahadlok ang uyab ni Abad nga si Neil Spencer Tiu wala mopatim-aw o mokooperar sa imbestigasyon sa kapolisan.

Sa pagdangop sa mga ginikanan ni Abad ngadto ni Pres. Rodrigo Duterte mimando gilayon nga ipasikop ug ipakiha si Tiu ug kaubanan.

Subay sa makamatay nga ecstacy ug sa nahitabo ni Abad ang Insik nga magpapatigayon nga si Kenneth Dong gitumbok nga supplier sa party drugas nga ecstacy. Si Dong maoy tag-iya sa Liv Super Club sa Mandaue nga usa sa upat ka party clubs nga gipanid-an.

Nasayran nga 14 ka mga ecstacy suppliers sa Metro Cebu nga usa ka batan-ong babaye ang big boss. Direktang pasahanan sa big boss ang hotel kansang tag-iya maoy nagsuplay kang Kenneth Dong nga nasikop sa National Bureau of Investigation (NBI).

Kahinomdoman si Dong maoy gitumbok nga middleman pagpasulod niadtong 6.4B pesos nga shabu gikan sa China nga gani maoy nakapalagpot sa Bureau of Customs Chief Nicanor Faeldon.

Nasubay sab nga gikan sa mga nasod sa Europe kasagaran sa Netherlands ang suplay sa ecstacy. Ipadala sa Pilipinas nga isal-ot o isagol sa kargamentong mga food supplement aron makalusot.

Kadtong namaligya og ecstacy nga si Neil Benjamin Eugenio Yap gi-ambush patay sa dalan MC Briones, Mandaue sa Marso 6, 2019.

Laing mga drugas naglakip sa shabu, zombie, cocaine, nubaine ug marijuana. Dunay lakang nga himoong legal ang marijuana kay giingong epiktibong tambal sa sakit. Nag-ong-ong sa kongreso ang balaodnon “ Legalizing and Regulating the Medical Use of Marijuana “. Hinoon ang marijuana legal na didto sa nasod sa Canada, Uruguay ug pipila ka estado sa Amerika.

Ang magpaulipon sa drugas sama ra sa usa ka buhing-patay. Makapukan sa maayong kaugmaon. Daghang ang gitalikdan sa maayong ugma. (csa_1156@yahoo.com/09064648954)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph