ALANG sa mga deboto ni Senyor Santo Niño gidungog ang ilang mga pag-ampo sa kalit nga hukom sa nasod sa Iran nga di na nila sundan ang ilang gihimong pagpa-uwan og mga missile sa nasod sa Iraq diin nahimutang ang mga sundalong Amerikanhon apil na ang ilang embahada.
Ang hukom sa Iran gisundan sab sa pamahayag ni Presidente Trump sa Estados Unidos nga wala na say retaliation nga mahitabo gikan sa ilang habig. Kini nga kaugmaran nahitabo samtang nagkaduol na ang kapistahan ni Señor Santo Niño dinhi sa Sugbo. Human napatay sa Estados Unidos ang Commander sa militar sa Iran nga si Maj. Gen. Qassem Soleimani nibawos ang Iran pinaagi sa pagpalupad og mga missile.
Dinhi nitumaw ang daghang espekulasyon nga kadto maoy magsilbing pabilo sa ikatulong gubat sa kalibutan. Kung nabalaka man ang kadaghanan, mas labaw nga tensiyonado kadtong may mga minahal sa kinabuhi nga nagtrabaho sa Iraq ug mga silingang nasod. Maoy hinungdan nga gimando ni Presidente Duterte ang pagpabakwit sa mga Pinoy nga nanarbaho sa Iraq. Gipanguyawan man gani ta nga puwerting layoa ra nato sa Iraq. Unsa na kaha kadtong tua magtrabaho didto?
Sigun sa mga post sa social media, ilang gipasalamatan ang Senyor sa kalit nga pag-usab sa mga pamahayag sa mga lider sa duha ka nagkasungi nga mga nasod. Dili na bala ang gustong irakrak ni Trump. Sanctions nga mopalisodlisod sa nasod sa Iran. Hagbay na bang nag gubat ning duha ka nasod. Salamat nga nahupay og gamay ang mga kabalaka apan di gihapon ka kompiyansahan
Tayming kaayo kay mao sab ang pagsugod sa Nobenaryo sa iyang kapistahan. Gawas sa gikahadlokang gubat, unsa pa may lain ninyong gi-ampo sa milagrusong bata? Kong akoy inyong pangutan-on, ang lain nakong gi-ampo mao ang grabing pagsaka karon sa presyo sa mga palaliton. Ultimo ang mga lamas sa Carbon market nisaka na og pipila ka porsento. Mao ni pirme nakong gibantayan sukad pa kaniadto. Mosaka gani ang presyo sa lamas, lakip sab nga mosaka ang ubang palitonon.
Pero dia koy pangindahay sa mga tag-iya og carenderia. Hibawo mo kanang inyong mga kustomer, nasayod man gud na sila nga bisan mosaka pa ang kilo sa bugas, motubo man gyud na kong imo nang lung-agon. Ayaw sab tawon ninyo palabii og pagamay ang tag 10 pesos ninyo nga takos. Pastilang piyasota nalang gyud sa P10.00 nga kan-on nga gisud og plastik. Ang uban ikatag sa plato pero sulaye og kumot di ba manghod ra sa usa ka hakop.
Kita mo sa uban ninyong kustomer nga mangayo nalang gani og sabaw human maka order og usa ka takos nga pansit o gigisa nga talong. Kutob ra gyud diha kay apiki sa badyet. Gawas sa kan-on, gipagamyan sab og maayo ang hiwa sa ilang linat-an ug ubang putahi. Ambot ngano nga di kaayo taas ang pagsaka sa presyo sa karne. Ang isda wa na ulii sukad nga nisaka ang presyo sa miaging tuig.