USA na sab ka gituohang pusher ang namenteryo human misukol sa operatiba sa Sasa Police Station atol sa drug bust niadtong Miyerkules sa gabii, Enero 8.
Ang napatay mao si Saito Pongo, alyas Tatog, hamtong ang pangedaron, residente sa Tagum City.
Sumala ni Police Major Reuben Libera, hepe sa Sasa PNP, nga dugay-dugay na sab nila nga gisundan ang ilegal nga lihok sa suspetsado.
Miyerkules sa gabii, nakigkoordinar ang suspek sa operatiba hinungdan nga nagmalampuson ang operasyon.
Dihang gitunol na sa suspek ang shabu bugti sa salapi, mibunlot kini og pusil dihang iyang nasayran nga mga pulis ang iyang ka-transaksyon.
Usa ka .38 revolver, mga buhing bala ug pakite sa gituohang shabu ang narekober sa mga pulis sa posisyon sa suspek.
Sumala sa Davao City Police Office nga mas gipahugtan ug gipalawman nila karon ang operasyon batok ilegal nga druga human nagpasiatab ni Vice Presidente Leni Robredo nga pakyas ang gobyerno sa programa niini nga war on drugs. (Jeepy P. Compio)