SUPERBALITA CEBU

Congrats Aki!

■ ONE FC: Giisa sa referee ang kamot ni Yaw-Yan Ardigma Cebu fighter Roel “Aki” Rosauro human sa iyang kadaugan sa ONE Championship kagahapon sa Thailand. / Tampo nga hulagway

HUMAN sa ikatulo nga pagsuway, naangkon na ni Cebuano warrior Roel “Aki” Rosauro ang maidlas nga kadaugan sa ONE Championship pinaagi sa unanimous decision batok sa beteranong Indonesian nga si Yohan Mulia Legowo sa undercard sa ONE Championship - “A New Tomorrow” promotion niadtong Enero 10, 2020 sa Impact Arena sa Bangkok, Thailand.

Pagsugod pa lang sa away, nakitaan na og determinasyon si Rosauro ug gidominar niya ang away pinaagi sa iyang makusog nga mga patid ngadto sa tiil ug lawas ni Legowo.

Ang 31 anyos nga sakop sa Yaw-Yan Ardigma Cebu padayon sa iyang kaagresibo sa 2nd round gamit ang iyang roundhouse kicks. Hinuon pinaagi sa iyang counter punches, nakabawosbawos sab si Legowo.

Sa 3rd round, mas miagresibo si Rosauro gamit ang iyang mga patid, apan wala niya napatumba si Legowo.

Si Rosauro misaka sa 5-3 nga rekord samtang si Legowo natagak sa 8-9 nga baraha.

Nagkanayon si YawYan Ardigma founder Master Benigno “Ekin” Caniga Jr. nga ang kalampusan ni Rosauro nagsilbeng tubag sa iyang mga pag-ampo ngadto kang Senyor Sto. Niño ug sa iyang inahan nga mitaliwan pipila ka mga adlaw sa wala pa ang away ni Rosauro.

“Very excellent ang iyang performance karon nga duwa niya sa ONE FC,” matod ni Master Ekin. “Daghan salamat sa mga nag-pray sa duwa ni Aki. Gipangayo ko ni nga duwa ni Sr. Sto. Niño ug sa akong nanay nga nitaliwan. Before mi nilarga nananghid ko ni nanay nga gihaya nga giyahan mi ni niya sa duwa sa Thailand. Daghan kaayong salamat sa mga Cebuano nga nagsuporta ug sa tanan nakong mga estudyante sa Yaw-Yan Ardigma.”

Gipasabot ni Master Ekin nga kanunay motan-aw ang iyang inahan sa mga away ni Rosauro kaniadto gumikan kay mahiligon kini sa mixed martial arts.

Si Rosauro unang miaway sa ONE Championship niadtong 2018 diin nasugamak kini sa first round submission nga kapildihan batok kang Li Kai Wen.

Nasundan kini og laing kapildihan nga pinaagi sa unanimous decision batok kang Sunoto sa samang tuig.

Matod ni Master Ekin nga naglaom siya nga gumikan sa dalaygong kadaugan ni Rosauro, hayan mahatagan dayon kini og laing away sa One Championship.

Asoy ni Master Ekin nga magpaalim lang si Rosauro sa angol sa iyang kumagko sa kamot nga iyang nasinati sa away ug human niini, mobalik dayon kini sa pag-training. / ESL


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph