BUAKON sa Meralco Bolts ug Brgy. Ginebra Gin Kings ang ilang 1-1 nga panagtabla sa ilang panagharong og balik karong alas 6:30 sa gabii sa Game 3 sa Philippine Basketball Association (PBA) Governor’s Cup finals series sa Smart Araneta Coliseum.
Human sa ilang kulbahinam nga kapildihan sa Game 1, 87-91, ang Bolts ni coach Norman Black mingsandig sa iyang shooters aron bawsan ang Gin Kings sa Game 2, 104-102, niadtong Biyernes sa Lucena City.
Ang Bolts igo lang mitali og 21.9 percent shooting sa Game 1 apan mibawi kini sa Game 2 pinaagi sa pagrehistro og 42.1 percent shooting nga tatawng maoy nag-agak kanila sa kadaugan.
Sa Game 2, ang Bolts nagpauwan og 16 ka three-pointers nga maoy naghatag og grabeng labad sa ulo ni Gin Kings coach Tim Cone.
“You never know when it’s gonna come,” asoy ni Meralco coach Norman Black kabahin sa ilang mga tira sa gawas nga napatik sa PBA.PH.
“Last game, we couldn’t hit the side of the ocean so you’ll never know when those shots are gonna fall. I think it’s also the determination of not going down 0-2.”
Labing seguro, ang Gin Kings aduna gihan-ay nga plano kon unsaon pagpugong ang outside shooting sa Bolts ning higayuna.
“They shot the ball really well, Norman talked about that and they got their shots in without defense a lot of open shots. Again we got to go to the drawing board and figure out what’s going on,” matod ni Cone.
Game 2 boxscores:
Meralco (104) - Durham 21, Amer 17, Newsome 17, Almazan 15, Pinto 12, Salva 9, Caram 5, Quinto 5, Faundo 3. Ginebra (102) - Brownlee 35, Pringle 23, Aguilar 18, Tenorio 10, Slaughter 6, Thompson 4, Caguioa 4, Mariano 2. / ESL