WALA man tuod si Olympian Mary Joy Tabal dinhi sa Sugbo atol sa kasaulogan sa piyesta ni Sr. Sto. Niño apan mobawi siya pinaagi sa pagpahinungod sa umaabot nga lumba sa dagan nga iyang salmutan ngadto sa Balaang Bata.
Ang garbo sa Brgy. Guba, Cebu City mosuway paglabni sa iyang ikapitong sunodsunod nga titulo sa Milo Marathon National Finals women’s category sa Clark City karong Enero 19, 2020 atol sa Sinulog Festival.
“I may not be in Cebu next Sunday but I will dedicate the race to Sto. Niño. It’s my offering and my way of celebrating the Sinulog Festival,” matod ni Tabal, kinsa dugay na nga deboto sa Batang Hesus, sa interbyu sa Sun.Star Cebu.
Lab-as pa sa iyang kampanya sa Southeast Asian Games, si Tabal wala molugak sa iyang training alang sa Milo Marathon diin ikaparang niya ang kasamtangang SEA Games gold medalist nga si Christine Hallasgo.
Ang panagparang nila ni Tabal ug Hallasgo mao ang labing giatangan ning maong edisyon sa Milo Marathon.
Si Hallasgo, kinsa lumad nga taga Malaybalay, Bukidnon, maoy nakailog sa SEA Games title ni Tabal niadtong Disyembre sa miaging tuig diin igo lang nakaangkon sa silver medal ang kanhi sprinter sa Southwestern University (SWU). Hinuon labing seguro, dili sab magpalupig ang ubang qualifers gikan sa Manila, Subic, Lingayen, Lucena, Batangas City, Cebu City Iloilo City, General Santos City, Davao City ug Cagayan de Oro City. / RSC, ESL