BISAN wala ang usa sa ilang duha ka mga lider nga si Anthony Davis, ang Los Angeles Lakers nakamaneho lang gihapon pagmakmak sa hosts Dallas Mavericks, 129-114, kagahapon sa National Basketball Association (NBA).
Sa pagpadaplin ni Davis, kinsa adunay angol sa iyang likod, ang four-time MVP nga si LeBron James nikayod og insakto ug nagpakatap kini’g 35 puntos, 16 rebounds ug pito ka assists aron pangulohan ang kadaugan.
Apan ang mikawat og dakong atensyon mao si Kyle Kuzma, kinsa maoy mihulip kang Davis sa starting line-up.
Wala gipakyas ni Kuzma ang pagsalig nga gihatag sa Lakers coaching staff ngadto kaniya ug nimugna kini’g iyang season-high nga 26 puntos aron tapakan ang haw-ang nga nabiyaan ni Davis.
Si James nakamugna og puntos ug nakatunol og assists sa pagsutoy sa opensa sa Lakers sa sayong bahin nga nakahatag kanila og 22 puntos nga labaw sa halftime. Ning mga higayuna, ngil-ad nga nakaduwa ang labing pambato sa Mavericks nga si Luka Doncic, kinsa tungod sa iyang kapungot, gigisi niya ang iyang jersey.
“I played really bad,” matod ni Doncic, kinsa maoy 2019 Rookie of the Year. “I felt like I don’t know how to play basketball. It wasn’t me. I gotta get better. A lot.”
Hinuon nakamaneho lang gihapon pagmugna og 25 puntos ug 10 rebounds si Doncic aron pangulohan ang Mavericks.
Ang Lakers mingposte sa ilang ikapitong sunodsunod nga kadaugan nga nagpasaka sa ilang rekord ngadto sa 31-7 samtang ang Mavericks nahagbong sa 23-15 nga baraha.
Ang pito ka sunodsunod nga kadaugan maoy labing taas nga naposte sa Lakers ning maong season.
“It’s not about how many you can win in a row,” batbat ni James. “It’s just how you continue to get better every individual game and I thought we did that here.”
Si Davis wala nakaduwa gumikan kay naangol kini atol sa kadaugan sa Lakers batok sa New York Knicks, 117-107, niadtong Miyerkules. Dili ra hinuon grabe ang pagkaangol ni Davis ug nagkinahanglan lang kini og pahuway alang sa iyang pagpaalim.
Ning sangkaa, si Kuzma nakamugna na og 11 puntos sa 1st quarter human kini nakahakot og kinatibuk-ang 13 puntos sa nag-unang tulo ka mga higayon nga nakigbatok ang Lakers sa Mabericks.
“I’m just confident, especially when I know, being I’m a rhythm player, when my minutes are high, just trying to be myself,” matod ni Kuzma.
Sa laing mga duwa, ningdaog ang Brooklyn Nets batok New York Knicks, 117-113, New Orleans Pelicans batok New York Knicks, 123-111, Milwaukee Bucks batok Sacramento Kings, 127-106, Los Angeles Clippers batok Golden State Warriors, 109-100, Washington Wizards batok Atlanta Hawks, 111-101, Indiana Pacers batok Chicago Bulls, 116-105, Memphis Grizzlies batok San Antonio Spurs, 134-121, Utah Jazz batok Charlotte Hornets, 134-121, / ESL