Fajardo gitagaan lang og lugway aron makapahuway

GIPASABOT sa Samahang Basketbol ng Pilipinas (SBP) nga gusto nilang makapahuway ang Sugboanong higante nga si JuneMar Fajardo hinungdan nga wala na kini nila gilakip sa Gilas Pilipinas 24-man pool alang sa ilang pagpangandam sa first window sa FIBA Asia Cup qualifiers nga ipahigayon sunod buwan.

Nagkanayon si SBP president Al Panlilio sulod na sab sa taas nga panahon nga nagserbisyo alang sa nasod ang pambatong sentro sa San Miguel Beermen hinungdan nga angay lang kining hatagan nila’g lugway.

Nidugang si Panlilio nga napamatud-an na ni Fajardo kon unsa siya ka bililhon sa national team ug ang nakanindot, kanunay andam ang produkto sa University of Cebu (UC) Webmasters nga moserbisyo alang sa nasod.

Labing seguro, matod ni Panlilio nga kuhaon nila’g balik si Fajardo sa sunod nga tahas sa Gilas Pilipinas. / ESL