ALAS sayis-imedya sa sayong gabii. Misulod si Primo sa Green Meadows Restobar. Diyutay pa ang mga kustomer. Daghan pang bakante nga mga lamesa. Unya nakita niya si Sofia, iya kanhing kapikas, nga lima na ka tuig nga nibuwag kaniya. Nag-inusara kini sa lamesa nga nahasuok. Duna silay anak nga lalake, si Kevin, diyes anyos na karon, nga tua sa iyang apuhan (ginikanan ni Primo) magpuyo.
“Uy! Kumusta, Sofia?” ni Primo nga mapahiyumon. Wa siyay pagdumot kang Sofia, bisag kini maoy nakasala sa ilang kaminyuon.
“Nia. Nagginhawa pa panagsa. Ikaw, kumusta pod?” ni Sofia
“Maayo gihapon. Naa kay ka-deyt nga gipaabot?” ni Primo.
“Oo. Ikaw?” ni Sofia.
“Duna sab,” ni Primo.
“Tsika-tsika lang una ta samtang nagpaabot sa atong mga ka-deyt,” sugyot ni Sofia. Gisenyasan niya si Primo nga molingkod sa bakanteng lingkuranan atbang niya.
“Kanang imong ka-deyt, dugay na mo ana niya?” ni Primo.
“Wa pa mi magkakita. Blind date ni,” ni Sofia.
“Pareho diay ta. Blind date sab ang akoa,” ni Primo.
Mipahiyom si Sofia. “Ok ka ra sa imong trabaho isip freight clerk? Imong panglawas, way problema?”
“Ok ra gyud. Ikaw?” ni Primo.
“Ok ra sab,” ni Sofia.
Nagtinutokay sila. Nagpahiyumay. Ang ilang mga mata ug hunahuna ang naghangpanay ning panagkita nila human sa hataas nga panahon.
“Wa pa diay kay laing pamilya?” ni Primo.
“Wa gyud. Sukad ta nagbuwag wa na koy permanenting karelasyon. Puro na lang tilaw-tilaw,” ni Sofia. “Ako sab,” ni Primo.
Nahilom silang duha. Mitan-aw sa lamesa. Unya nagdungan og panghupaw. May miduol nga weyter nga mihatag og Menu kang Primo.
“Calamares, Dong, para sa akong amiga,” ni Primo.
“Wa gyud diay ka malimot sa akong paboritong appetizer!” ni Sofia nga mitan-aw sa weyter ug miingon, “Iya, Dong, kinilaw nga tangigue.”
“Sama nimo, wa sab malimot. Kana lang una, Dong,” ni Primo.
Gisulat sa weyter ang ilang order sa iyang ‘notepad.’ “Fifteen minutes, Sir!” matod sa weyter dayong talikod.
Tsikinini ang naingnan sa ilang panagbuwag. Usa ka higayon sa paghiuli ni Sofia sa ila, may lagom ug puwa-puwa nga tsikinini sa walang dapit sa iyang liog. Gibuwagan dayon siya ni Primo. Mokuyog unta si Sofia kang David nga iyang nakabit nga ulitawo sa Mindanao. Apan nadala siya sa tambag ni M’am Marilou, iyang superbisor sa Galaxy Appliance Center.
“Kanang imong pagpangabit, uwag ra na; dili na gugma. Pangayog pasaylo sa imong bana. Naa god moy anak. Kon dawaton kag balik, maayo. Kon dili, mahinayon gyud inyong panagbuwag,” ni Marilou.
Gipasaylo ug gidawat ni Primo si Sofia. Apan sa kada gabii nga magminahalay sila sa kama magsigeg sukit-sukit si Primo kon giunsa si Sofia pagpalami ni David nga wa man kini makamatngon nga gihimoan siyag tsikinini. Naulawan pirme si Sofia ug napugos na lang kini pagbiya sa hingpit.
Milanat og usa ka oras ang ilang tsika-tsika. Way mitunga sa ilang ka-deyt. Paglabay sa duha ka oras sila gihapon ang nag-estoryahay. Mi-order na lang silag panihapon.
“Nganong mianhi ka man dinhi?” ni Primo. “Nagpatag-an man god ko. Unya giingnan ko nga karong gabhiona mahimamat nako ang lalake nga ikauban nako sa tibuok kinabuhi,” ni Sofia.
“Mao ba? Karon kuno mahimamat nako ang babayeng akong ikauban hangtod matiguwang,” ni Primo.
Nagtinan-away sila nga way nalitok nga pulong sa usag-usa.
Alas diyes na sa kagabhion. Mingaw na ang restobar. Nakahurot na silag tagurha ka botelyang beer. Nanginit na ang ilang mga aping.
“Kon di moabot imong ka-deyt, kita na lang ang mag-deyt. Okey?” ni Primo.
“Hmmph!” ni Sofia nga nagduha-duha. “Ubos sa usa ka kondisyon!” “Unsa man?” ni Primo.
“Ayaw na gyud paghisgot sa akong sala. Kon gipasaylo na ko nimo, ilubong na to sa kalimot,” ni Sofia. “Sorry! Ako na say mangayog pasaylo nimo. Mao gyud nay akong gihinuktokan sa dugay nang panahon. Mao sab nay akong nahimong sala nganha nimo,” ni Primo.
“Okey. Nagkasinabot na ba ta?” ni Sofia. “Sure!” ni Primo.
“Asa man ta?” ni Sofia. “Tsik-in una tag motel,” ni Primo.
“Approved!” ni Sofia. Ug nag-apir sila nga mahimut-on. Misenyas si Primo sa weyter aron bayran ang ilang ‘chit.’ Nakabuka ang ilang mga mata sa nagkasulagma nilang blind date. (KATAPUSAN)