DAGHAN ang gusto nga mogamay ang timbang kay gibug-atan na sa lawas. Naay nangutana nako unsa ang labing maayong paagi. Tubag nako mao ang pag-diet. Apan kon di ka gustong mag-diet, pag physical exercise. And the best ang cycling, labina ang mountain biking.
Nganong nakaingon ko nga mas maayo ang mountain biking mopagamay kon kada adlaw kang magbiseklita? Kay daghan na kong mga higala nga makapamatuod ani, labina kon kada adlaw ang pagsikad. Bisan ako mismo kaniadto, wa koy giusab nga diet, mitibugsok ang akong timbang, gikan sa 176 pounds ngadto sa 153.
Sa akong gidak-on, ang akong ideal weight is 147 pounds. So, seven pounds ko nga overweight niadtong higayuna. But ang di maayong physical effect nako mao ang namiyahok ang akong nawong. Mi-mature kog samot tan-awon kay gawas nga mikalit kog gamay, kanunay na sab kong nabuwad sa init. Nangitom ko. But, kami gung mga hilig sa biseklita, kasagaran namo di maghuna-huna unsay kolor sa among panit basta kay nalingaw mi.
BURNER
Nganong makaingon ko nga nindot ang mountain biking sa pagpagamay kon himuon nimo kada adlaw? Kay tanang stored nimo nga pang-energy sa imong lawas, sunugon sa imong lawas ang tanan. Mao bitaw nga grabe modalag habhab ang mga mountain biker kon moabot na sa bukid.
Ako sab nga gi-emphasize nga kada adlaw kay mao usab ni ang akong nabantayan. Sa pagkatinuod, akong purpose di pagpagamay niadtong higayuna, kon di paglikay sa depression tungod sa pagkamatay sa amoang anak nga si Mary Heart.
Ang pag-reduce nako, bonus na lang to. Usa sab sa nakanindot sa biking kay gawas nga mominos ang imong timbang, nakasuroy ka pa. Lahi ang imong exertion sa bike kay sa mag gym ka, bisan gamit ang stationary bike.
Ang proof lang ani mao ang mga biker nga kada adlaw naghatag og panahon sa pagsikad. Bisan unsaon nilag kaon, di sila managko. Kay lagi, ang tanang stored nga fats ug sugar sa lawas, nasunog man kay gi-convert ngadto sa energy.
KON GUSTO
Mao na nga kon gusto kang mogamay, sikad og suway sa kabukiran. Lahi ra ang mahitabo nimo kay sa mag-diet ka lang. Mosamot na kon mag diet kag gamay ubanan sa exercise sa pagtindak, mas paspas kang mogamay.
Imagine, kon anha ka sa ilang Willy sa Busay kada adlaw, mga unom na ka kilometro nga imong sakaon. Kon bag-o ka pa, labing minos usa ka oras na nga tindak. Usa ka oras na nga exertion sa imong lawas.
Kon magkadugay ka na, mahimong molahos kag Buak kay ang ilang Willy makuha na lang nimog 30-40 minutos. Kana sa hinayhinay nga tindak.
Sa mga babaye nga nag-bike, makatabang ang biseklita sa pag-tone sa lawas. Kon ganahan kang moporma, pag biseklita na.