KINING atong lindog, dili lang monopoliya sa akong huna-huna og panahum. Modawat usab kita og mga reklamo gikan sa publiko pamasin nga ang ilang nga yango-ngo mahatagan og solusyon sa hingtungdang ahensiya sa kagamhanan. Sama na lang aning atong nadawat kabahin anang gipanghimo sa mga drayber sa mga public utility jeepneys nga magbiyahian sa Cebu City, Minglanilla ug Naga City nga rota.
Gipadangat kini sa usa ka magtutudlo nga wala lang magpa-ila. Ania ang iyang reklamo.
‘Super Bobby, naa koy hangyo kabahin sa grabe kaayong trip-cutting sa mga public utility jeepneys sa Minglanilla ug Naga. Anha ra kasagaran sa Tabunok/Lawaan, dili molahos sa Minglanilla o Naga. Unya ang mga studyante intawon nga gikan sa CIT, UC Mambaling, ug USJR maglisod intawon og sakay, pagukod- gukoron pa sa mga driver. Anha kasagaran sa Total Gas station sa Basak mag-atang mga students.’
‘Taga diha si Konsihal Dave Tumulak ug LTO 7 director Victor Caindec pero wa man sila intawon magtan-aw sa kahimtang sa mga estudyante. In fairness diay ni Sir Dave, iyaha diay tong gimando sa barangay Basak, Pardo kaniadto nga palinyahon ang mga pasahero. Naa sab gipa-monitor nga taga barangay. Pero naundang na ni dugay ra. Malooy ko makadungog sa mga estudyante nga ang kuwarta igo nalang pamasahe for one ride, maski gutom agwantahon kay wa nay extra money for candy or biscuit. Dili pod mo-double ride sila kay una, lisod pod kaayo ang pagsakay sa Tabunok o Lawaan. Ikaduha, magkulang na ang ilahang pamilite.’
‘Sa kada adlaw nakong biyahe, gikan sa Basak padulong sa Minglanilla, mao gyud ni akong makita nga dakong problema. Niadtong Lunes, Enero 6, unang adlaw sa klase, daghan kaayong mga pasahero mao nga mi-double ride ko. Diha ko sa Kinasang-an kay naay moliko diha nga para Naga. Naka abot ko sa Lipata pasado alas 9 na sa gabii. Unya 7 pm pa ko nag-atang. Ang wala makasakay ambot unsang orasa kaha sila nakauli.’
O, atong gitawagan ang LTO ug ang LTFRB aning maong problema. Hinaot nga inyo ning ma-aksiyonan. (bobbygnalzaro@gmail.com)