ANG pagkamagtutudlo giila isip usa ka bokasyon.
Kumustahanay, Himamatay, Ampoay, Ambitay, Paminaway. Mao kini ang mga nagpahiping kinaiya ug nakasentrong tema nga nagdala og kusog ug kalig-on sa mga Department of Education (Deped) Kabs sa Davao Region sa gipahigayon nga panagtigum niadtong Biyernes, Enero 10, hangtdo Sabado, Enero 11, didto sa RMPC Training Center, Camudmud, Babak, Island Garden City of Samal.
Usa sa mga gamot hinungdan niining talagsaong panagtigum mao nga ang matag-usa magpadayag ug magpakita og mga sakripisyo alang sa hiniusang pag-ampo alang sa usa ka “reconciliation” o pag-alim sa samad aron matagamtaman ang kalinaw sa kaugalingon, pamilya, katilingban, kinaiya, sa nasud ug sa tibuok kalibutan.
Gituohan nga pinaagi niini mapalig-on ang talagsaong bokasyon labi na sa pagkamagtutudlo nga aron mapahingusgan ang pormasyon sa mga kabataan karon ug aron mahatagaan og tubag ang ilang mga panginahanglan dili lang sa akademiko kon dili ang emosyonal, pisikal, mental ug espirituwal (Holistic) nga bahin sa kinabuhi.
“Dili nato kalimtan ang atong hiniusang misyon alang sa kaayohan ug kaugmaon sa mga kabataan,” matud pa sa Regional Education Support Services Division Chief Dr. Warlito Hua.
“Isip mga Kabs ug formators sa atong mga kabataan, ato silang tabangan ug suportahan ug atong hulipan ang mga kakulangan nga nakita nato diha sa DepEd ug labaw sa tanan dili nato pun-an o dugangan,” dugang pa ni Hua.
Gipasabot sab sa opisyal nga ang DepEd dili perfect institution. Sama sa pamilya dili sab perpekto.
Busa, mamahimo unta kitang role model ngadto sa atong mga kabataan ug sa mga kauban diha sa pagpalambo ug pagpreserba sa mga gitawag og “Basic Christian Values” nga atong nakat-onan ug napuy-an.
Nakat-onan diha sa mga pagpamalandong ug mga pagpaambit nga ang matag usa talagsaon. Kini tungod kay dunay lain-lain ug dili managsama nga kasinatian ug mga panglantaw sa kinabuhi. Kalisdanan man, mga pagsulay, kahadlok, pagduha-duha, kasakit ug kabalaka nga sarang maoy naangkon apan sa DepEd lang gihapon paingon.
Matud pa sa uban, “Bahala na ka Lord.” Ang pasabot ani nga imong gi-surender ang imong mga plano nga dili diay nimo makaya nga ikaw ra ug dawaton kon unsa man ang maayong plano sa Ginoo diha kanimo.
“Kung imong paminawon ug sundon ang plano sa Ginoo alang kanimo ug mosalig lang ka sa Iyaha, Siya kanunay mag-uban kanimo,” ang pamalandong ni Kabs Nelson Balagtas sa Davao Occidental.
Gihatagan kita sa Espiritu Santo nga makakita sa mga kalisdanan, problema ug mga panginahanglanon sa atong pamilya ug sa katilingban nga atong gialagaran, sa ato pa, kita ang dunay gasa (bokasyon) niini diha sa pagtubag, pagtabang ug paghatag og tabang suporta ngadto sa mga nanginahanglan.
“Dili unta kita mohimo’g mga pader (walls) batok sa atong mga kauban kon dili lapad nga agianan aron ato silang magiyahan kung asa sila padulong,” dugang ni Kabs Nelson nga nipadayon sa pag-ingon, “Ug mobalik kita ngadto sa diwa sa pag-ampo.”
Daghang nagatuo nga ang pag-ampo maoy bugtong taming batok sa mga kaaway, kahadlok, kabalaka ug sa mga problema nga modangat sa kinabuhi.
Mamahimong epektibo kining pamaagi kanunay diha sa matag katilingban.
“Dili unta kita magpatakod sa uban niining mga hulga sa katilingban aron madani kita sa ilang kakulangan kon dili kita ang magpatakod nila aron sila madani sa atong pag-ampo nga maoy modala kanila ngadto sa pagpalapnag ug pagpalambo sa DepEd core values, ang pagka-Maka-Diyos, Maka-Tao, Maka-Kalikasan ug Maka-Bayan,” dason ni Kabs Nelson.
Ang bokasyon wala magpabilin sa seminaryo kon dili nagpadayon diha sa imong kaugalingong panaw sa kinabuhi diin ikaw ug ako kanunay naglimbasog ug nakigbisog alang sa kaluwasan ug katagbawan sa tanan. Ug alang sa kahimayaan sa atong Langitnong Amahan, ang Magbubuhat sa tanan.
Sulod niining panagtigum, nakaplano nga adunay ipanghitabo, ipahigayon nga mga Youth Encounters o Spiritual Enrichment formations alang sa mg Grade 10 ug 12 students sulod sa tibuok rehiyon onse. Nadasig sab ang mga DepEd Kabs nga magplano sa kaugalingon nga makahimo’g self-evaluation pinaagi sa 2-3 day retreat aron mas mapalig-on pa gyud ang espirituhanon nga bahin sa kinabuhi.
Ipahigayon sab ang regular nga panagtapok sa mga DepEd Kabs nga pagahimuon sa tagsa-tagsa ka schools division. Tumong niini nga aron mas mapalig-on ang diwa sa pagtinabangay ug relasyon sa usag-usa, suporta ug pagdinasigay nga maoy makapalahutay sa pagpadayon sa maong bokasyon sa pagkamagtutudlo.
Mga napiling opisyales karong tuiga: President - Kabs Jimmy Jesuro; Vice President - Kabs Hercules Vertudaso; Secretary - Kabs Brian Payot; Auditor - Kabs Rafaelito de Veyra; Treasurer - Kabs Leo Labis; Public Information Officer - Kabs Edgar Sara; Peace and Order - Kabs Sherwin Galimba ug Kabs Bernard Anoba; Business Manager - Kabs Joseph Richel Ramos. (Feedback-09109006290)