DAVAO DE ORO -- Balor P49 mil nga kantidad salapi ang nahanaw gikan sa kolektor sa Small Town Lottery (STL) nga giingong gitulis sa wala mailhing mga armado alas 10:45 sa buntag, Biyernes, Enero 10, sa Barangay Babag, Monkayo.
Ang biktima giila nga si Kevin Enriquez, 27, collector/monitoring sa STL Oro Swerte Gaming and Leisure Corporation ug molupyo sa Purok 1-A, Barangay Mt. Diwata.
Sa report nga nakuha gikan sa Davao De Oro Provincial Police Office, nasayran nga usa ka Babiet Sinogbujan, 27, minyo nga taga Singanan, Bunawan, Agusan del Sur midangop sa Monkayo Municipal Police Station (MPS) ug mitaho kabahin sa gidangatan sa biktima.
Matud pa nga duha ka wala mailhing mga lalaki ang mitulis sa biktima didto sa nahisgutang dapit.
Base sa inisyal nga imbestigasyon, ang biktima nangolekta sa mga halin sa STL diin human sa gihimong trabaho midiretso sa Barangay Macopa sa samang lungsod sakay sa gimanehong kolor itom nga Honda XRM Motorcycle.
Apan pag-abot sa nahisgutang dapit, gigukod sa mga suspek nga nagsakay og kolor itom Honda Wave nga way plaka ug gimandoan nga pahunungon samtang gitiunan sa wala matinong kalibre.
Pugsanong gikuha ang nakolektang kuwarta nga gisulod sa sling bag nga balor og P49,000.
Human sa gihimong tulis, ang mga suspek nangagiw palayo padung sa Barangay Macopa area boundary sa lungsod sa Compostela.
Usa ka hot pursuit operation ang gipahigayon sa Monkayo MPS sa tinguha nga mailhan ug madakpan ang mikagiw nga mga tulisan. (Dexter T. Visitacion)