NISAAD si Mayor Edgar Labella nga ang Sinulog 2020 maoy grandest nga mahitabo sukad.
Angay lang kay mao kini ang pagsaulog sa Sinulog sa di pa ipahigayon ang ikalima ka sentenyal o 500 ka tuig sukad naabot si Ferdinand Magellan sa Sugbo.
Si Magellan baya ang nagdala sa balaang imahen ni Senyor Santo Niño ug sa Iyang inahan nga si Mama Mary. Ang maong mga imahen maoy iyang gigasa kang Rayna Juana dihang gibunyagan kini aron mahimong Kristiayano.
Tungod niini, nahimong kuna sa Kristiyanismo kun Cradle of Christianity dinhi sa Pilipinas, gani sa tibuok South East Asia, ang Sugbo.
Dako kini nga kalibutanong kasaulogan ang 2021. Mao nga angay lang nga maninguha si Mayor Labella nga bongga gyud ang Sinulog 2020.
Naa lang kitay mga kabalaka karon.
Pananglitan, bag-o lang natong nabantayan kaganihang buntag nga mga lima pa ka stall ang naa nay mamaligya diha sa Plaza Independencia.
Sa miaging duha ka tuig, sa Sinulog 2018 ug Sinulog 2019, mapuno na ang Plaza Independencia og mga mamaligyaay ug daghan naa kaayo ang tawo.
Inig human sa novena sa Basilica del Santo Niño man gud, dakong bul-og sa katawhan ang moadto sa Plaza aron mangaon.
Dayon, adto sab sa Plaza ang mga kalingawan.
Maayo unta nga maapas dayon sa Labella administration.
Laing dakong problema sa Sinulog mao ang ulahi nga mamaligyag tiket. Bisan pa man og nadugay ang printing, mahimo man nga sugdan na unta kaniadto pang Nobiyembre 2019 ang pamaligya online. Mahimo na man kining gamiton sa mga hotel sa Sugbo alang sa ilang mga promotion.
Gani, tungod kay nagbitay ang bugan sa mga tig-andam sa tiket, nabalaka ako sa ticket sales labi na nga usa ka semana na lang ang pamaligya niini.
Tungod sa kakulang sa promotion sa Sinulog 2020, ubos pa sab ang occupancy rate sa mga hotel.
Di man rason nga ang mga turista na-accommodate sa AIRBNB kay dako man gyud unta ang volume sa tourist response sa Sinulog.
Dayon, wa diay kita maka-attract sa mga big spenders?
Manghinaot lang gyud ako nga mabawi ra kini tungod sa momentum nga nagsugod na ang novena ug mabalik ang mga street parties.
Bisan pa man, prangka ko mosulat nga nabalaka ko niining team nga nagdumala sa Sinulog 2020. (@anol_cebu sa Twitter)