SAMARAN kaayo ang atong kalibotan. Nagpadayon ang mga sunog sa Australia diin kapin kon kulang tunga sa bilyon ka mga mananap na kuno ang nangamatay, gawas sa mga tawo nga naangin. Naghulat og ulan, tubig gikan sa langit, aron motabang og palong sa sunog. Unya niadtong Enero 3 sa buntag gipatay pinaagi sa usa ka US “airstrike” ang usa ka ilado ug gikahadlokan nga general nga Iranian, si Qasem Soleimani. Ang kahadlok ug kaguol nga miawas gikan sa mga maong panghitabo sama sa túlo sa tubig nga modugtong sa laing túlo sa tubig. Dili madugay moawas ang kahadlok ug kaguol. Ug may mga tawo nga moingon nga padulong na kuno kita sa dili malikayan nga gubat sa tibuok kalibotan.
Tubig usab ang gihisgotan sa ebanghelyo sa dihang nagpabunyag si Jesus sa Suba sa Jordan kang Juan nga Magbubunyag. “Pasagdi lang una karon, kay sa niining paagiha angayan gayod nato nga tumanon ang tanang pagkamatarong,” ang tubag ni Jesus sa dihang nagduhduha si Juan. Human siya mabunyagi, “Mikawas dayon siya gikan sa tubig; ug tan-awa, naabli ang kalangitan, ug nakita niya ang Espiritu sa Dios nga mikunsad ingon og salampati nga mitugdon kaniya”.
Morag eksena kini sa unang kapitulo sa libro sa Genesis diin adunay makusog nga hangin ibabaw sa katubigan. Simbolo ang katubigan sa kalandrakas. Usa diay magmugna ang Dios adunay kalandrakas ug ang hangin sa Dios anaa ibabaw niini. Sa pamalandong nga Kristohanon kining maong hangin mao diay ang Espiritu Santo. Niining yugtoa sa ebanghelyo ang Espiritu ibabaw ni Jesus kansang bunyag simbolo sa bag-ong kamugnaon.
Sumala ni propeta Isaias may piniling sulugoon ang Dios iyang “gikahimut-an pag-ayo; gihatag ko kaniya ang akong Espiritu”. Lahi ang batasan niini kay “dili siya mosinggit o motuaw...Dili niya balion ang huyang nga bugang ug dili niya palungon ang nagkaawop nga suga”. Malumo ug maaghop sama sa tubig nga kalma. Diha sa pagkakalma mogawas ang iyang gahom sa pagpagawas sa mga binilanggo. Kinaiya kini ni Jesus.
Ang maong tubig miawas na ngadto sa mga gentil. Diha sa mga Buhat sa mga Apostol, nagwali si Pedro didto sa balay ni Cornelio, usa ka opisyal sa mga Romanhong kasundalohan. Miingon siya nga ang “Dios walay pinalabi” kay tataw kaayo nga gigiyahan sa Dios si Cornelio. Moawas ang gugma sa Dios nga mao ang Espiritu Santo.
Taliwala sa mga hulga ug dakong kalisdanan nga giatubang sa kalibotan, mibaha usab ang pag-ampo sa mga tumutuo. Daghan kaayo ang nag-ampo. Daghang mga lider nga bugnawg ulo ang nag-ampo alang sa kalinaw. Kon padayonon kini may paabuton kita nga bag-ong kamugnaan.
Mitampo na ba kita sa baha sa pag-ampo nga ang tubod mao ang pagbunyag ni Jesus sa tubig?